حرصت النجمة ليلى علوي على حضور الجلسة الحوارية للنجمة لبلبة، ضمن فعاليات الدورة الخامسة من مهرجان البحر الأحمر السينمائي.

وخلال الجلسة، وجهت ليلى علوي سؤالا للفنانة لبلبة قائلة: 'على قد قدراتك في الرقص والاستعراضات والمزيكا والغنا، بحس إن إنت بتحبي الممثل أكتر شيء'.

وأضافت ليلى علوي: 'إنت ممثلة شاملة بكل المقاييس، مسرح وسينما ودراما، لكن بحس إن إنت بتستمتعي أكتر وإنت بتخشي جوا شخصية بتركيبة غير نونيا، هل ده صح؟ وإيه الدور بعد الأفلام الكتيرة والتميز الكبير اللي حققتيه اللي عايزة تعمليه بكرا؟'.

استعادت لبلبة خلال الجلسة كواليس تعاونها مع المخرج عاطف الطيب في فيلم 'ليلة ساخنة'، وكيف اختارت معه طريقة مشي شخصية (فتاة الليل) في الفيلم قائلة: 'عملت مشية شوية عوجت رجلي قلت يمكن تعجبه، قال لي لأ فتاة الليل متمشيش أبدا ورجليها جنب بعض، والحقيقة اتعلمت منه حاجات كتير'.

وأضافت: 'الفيلم ده غالي علي أوي، مكنتش عارفة إني هاخد فيه 13 جايزة أحسن ممثلة، بس يا خسارة مشافش الجوايز دي لأنه كان توفى'.

كما تحدثت لبلبة عن كواليس فيلم 'جوازة ولا جنازة' الذي يعد من أحدث أعمالها قائلة: 'خفت لما اتعرض عليا دور 'جوازة ولا جنازة' لأنه أول فيلم للمخرجة، لكن بعد 12 دقيقة مع المخرجة وافقت، أولا لأني ارتحت لها، ثانيا لأنها وضحت لي هي عاوزه مني إيه في الفيلم'.

وروت لبلبة جانبا من ذكرياتها في فيلم 'ضد الحكومة' قائلة: 'كنت خايفة من عاطف الطيب في فيلم 'ضد الحكومة'. كان ساكت ومبيهزرش زي ما أنا متعودة، وفي يوم اتصلت بيه وسألته: حضرتك مبسوط مني ومن أدائي؟ قال لي اشمعنى؟ قلت له: عشان لما بنخلص متقوليش برافو حلو. قال لي: طالما قلت اللي بعده يبقى أنا مبسوط'.

وأكدت لبلبة أن شغفها بالتمثيل لا يزال بنفس القوة قائلة: 'رغم كل السنين دي لسه عندي كتير مقدمتهوش ولسه في شغف. طبعا أدوار تناسب السن'.

وكشفت لبلبة سر عدم مشاركتها 'الزعيم' عادل إمام في عمل مسرحي قائلة: 'رغم إني اشتغلت كتير مع عادل إمام سينما ومؤخرا كمان تليفزيون لكن للأسف مشتغلتش معاه مسرح، والفرصة الوحيدة اللي جت لي معاه مسرح كنت مرتبطة بفيلمين ومعرفتش'.

يُكرم مهرجان البحر الأحمر السينمائي هذا العام صفوة من الممثلين وصناع الأفلام المميزين من الممثلة والمخرجة الفرنسية الحائزة على جائزة الأوسكار جولييت بينوش والمشاركة في المهرجان (بفيلم في ـ آي: في الحركة)، والمخرج والمنتج الفرنسي الجزائري المرشح لثلاث جوائز أوسكار رشيد بوشارب (أيام المجد)، والممثل الإنجليزي السير مايكل كين الفائز بجائزتي أوسكار (فارس الظلام)، والمخرج والمنتج ومنسق المشاهد الخطرة من هونغ كونغ ستانلي تونغ (بفيلم أسطورة)؛ والممثلة الأمريكية سيغورني ويفر (إلين)، ويقام المهرجان في مدينة جدة في الفترة من 4 إلى 13 ديسمبر 2025.

الجدير بالذكر أن مهرجان البحر الأحمر السينمائي الدولي قدّم خلال دوراته السابقة أكثر من 520 فيلمًا من مختلف أنحاء العالم، جامعًا بين أبرز الأصوات السينمائية الواعدة والأسماء العالمية المرموقة. وقد أسهم المهرجان، عبر برامجه المتنوعة ومبادراته الداعمة للمواهب، في تعزيز الحراك السينمائي في المملكة والمنطقة، وترسيخ مكانة جدة كحاضنة لإبداعات السينما ومركزٍ عالمي لصناعة الأفلام ورواية القصص.

لو فاتك: فن ولا فنكوش - 16 سؤال كل واحد هيجاوب لوحده ... عرفت كام سؤال منهم؟