استعاد الفنان أشرف عبد الباقي ذكريات بعض الأعمال التي قدمها ومنها مسلسل 'حكايات زوج معاصر' وفيلم 'حب البنات' وكواليس تقديمه لهذه الأعمال.

وقال أشرف عبد الباقي خلال لقائه مع الإعلامي معتز الدمرداش في برنامج 'ضيفي مع: 'هقولك على حاجة غريبة بالنسبة لـ 'حكايات زوج

معاصر' و'حب البنات' تحديدا الاثنين جولي في سنة كانت بالنسبة ليا صعبة قوي والدي اتوفى وبعديه مجدي كامل وده كان أقرب صديق ليا ده كان شاعر ومؤلف وكنت بقعد اشتغل معاه شغل كتير جدا معظم الحاجات بتاعه المسرح بقعد أنا وهو نكتبها وبعديه بشهر كمان علاء ولي الدين مات فالثلاثة دول في 3 أو 4 شهور كانوا بالنسبة ليا ما فيش كلام يتقال، جالي فيلم وجالي مسلسل المسلسل ده ما فيش بطلة موافقة تيجي تعمله فخليناهم 3 بطلات هتبقى روجينا 10 حلقات وبسمة 10 حلقات وكان في ممثله تالتة هتعمل 10 حلقات عملت حلقة ومشيت وروجينا كملت مكانها يعني كل العلامات بتاعة الفشل'.

وتابع أشرف عبد الباقي: ' وفي التوقيت ده أنا ما كانش عندي بيت أنا كنت مأجر وكنت وصلت لسن كبير وكنت متجوز وعندي أولاد عايز اشتري شقه ففي التوقيت ده جالي الفيلم وجالي المسلسل بكل المقاييس الحسابية لا المسلسل هينجح ولا الفيلم هينجح أنا رحت أرمي نفسي فيهم عشان أخرج من اللي حاصل لي فسبحان الله الاثنين ينجحوا ويعملوا رد فعل كويس واشتري شقة'.

وأكمل أشرف عبد الباقي: كنا في 2003 فاكر الراجل اللي بعها لي كانت ساعتها بـ 360 ألف جنيه لأنها كانت دوبلكس، أدفع 200 والـ 160 يتقسطوا، مراتي قالتلي روح شوف الشقة وأنا معيش إمكانيات انا بيجيلي الحمد لله وقتها فلوس كتير بس بصرفها لازم كلها لآخر مليم وأسافر واتفسح، فالمهم قالت لي روح شوف الشقة، أيوة هشوف شقه هعمل بيها إيه معيش فلوس طب شوف بس شفتها حلوة وبما إن شغلتي المقاولات والديكورات فأنا عارف هتبقى شكلها عامل إزاي طب شوف الدوبلكس، إذا كنت مش هقدر على الشقة أشوف الدوبليكس طب أقعد مع الراجل أقعد معاه أقوله إيه، أنا فاكر اسمه هو دكتور مختار وهو طبيب بس كان دخل في مجال مقاولات وبني العمارة رحت قعدت معاه لقيته حافظ أشعار أحمد فؤاد نجم وبيسمع لي المونولوج بتاع أحمد زكي في فيلم 'ضد الحكومة' محب للفن قعدنا اتكلمنا كتير وبعدين قال لي ها انت اللي عجبتك طبعا الدوبلكس، قلتله أنا بس حبيت اتعرف بيك قال لي أنت معاك كام قلت له مش هينفع قال لي معاك كام قلت له معايا 20 ألف قال لي خلي معاك 10 وهات 100 ولما تكمل الـ 200 هعمل لك العقد، قعدت كل دفعه تجيلي من الفيلم ولا المسلسل اللي أنا عاملهم عشان كده أديهاله لغاية ما عملي العقد'.

اقرأ ايضا: