خلال لقائه مع الإعلامية لميس الحديدي في برنامج 'كلمة أخيرة' الذي تقدّمه على قناة ONE، أكّد الفنان كريم فهمي أنه لا يشغل باله كثيراً بفكرة البطولة أو حجم الدور بمقدار ما يهتم بجودة العمل ومدى اقتناعه بالدور، مؤكداً أن 'الحب الحقيقي للمهنة' هو المحرّك الأساسي في اختياره لأعماله الفنية.

وقال كريم: 'أنا سهل جداً ممكن أكون بطل في مسلسل، وأطلع ضيف شرف في مسلسل تاني... لو دور صغير عجبني ومعنديش أي مشكلة، المهم أحافظ على قيمتي الفنية والأدبية'.

وعن ظهوره ضيفَ شرفٍ في مسلسل 'إش إش' رغم تصدّيه للبطولة في 'وتقابل حبيب'، أوضح كريم فهمي: 'الموضوع بدأ باتصال من المخرج محمد سامي، قال لي عايزك معايا ضيف شرف... قلت له على طول: حاضر يا سمسم. أنا معنديش حسابات البطولة والنجم الأول... أنا بشتغل علشان بحب الشغلانة مش علشان شهرة وخلاص'.

وعن سرّ ارتباط الجمهور الوثيق بشخصية 'فارس أبو العزم'، تساءلت لميس الحديدي إن كان السبب هو افتقاد الناس للرومانسية أو النموذج الشجاع المخلص، ليردّ كريم: 'النجاح رزق وتوفيق من عند ربنا، مش دايماً المجهود بيكفي. ممكن تشتغل وتتعب وتقدّم أحسن حاجة وربّنا ما يكتبش النجاح. أنا مش بعرف أفرح أوي بنجاحاتي... دايماً بقول الحمد لله، وربنا اللي بيوفق'.

وعن سعيه للبطولة المطلقة، علّق كريم بمنتهى الصراحة: 'مش لازم أبقى الاسم الأول، ومش بقول كده علشان مش مهم... لأ، بس لو حسبتها كده مش هنجح، لأن النجاح بالنسبة لي مش مربوط بالتصنيف، هو مربوط بالراحة الداخلية والشغف اللي بيخلّيني أشتغل'.

واختتم كريم فهمي حديثه قائلاً: 'ميهمّنيش أكون اسم أول ومش معنى كده إنها مش مهمة بس لو حسبتها بالطريقة دي مش هنجح لأني عارف نفسي أنا مش بكتب فيلم غير وأنا مبسوط... مش بعمل حاجة غير لو حسّيت إني عايز أعملها. وبحبها دي مش بس شغلانة، دي حاجة بحبها'.