كشفت الفنانة مي عمر تفاصيل تحضيراتها لمسلسل 'إش إش' موضحة أنها تدربت على الرقص.

وقالت مي عمر خلال لقائها ببرنامج 'تفاعلكم': 'قبل المسلسل مكنتش بعرف أرقص وفضلت 6 شهور أتعلم عشان لازم للشخصية'.

وكشفت مي عمر أنها خسرت الوزن الزائد الذي كانت اكتسبته من أجل شخصية 'نعمة الأفوكاتو' قائلة: ' أنا رجعت لوزني الطبيعي لأني كنت في نعمة تخنت شوية عشان الدور، بعدين رجعت لوزني لأن الدور لازم تبقى البنت رفيعة لأنها بتشتغل راقصة'.

وتحدثت مي عمر عن مسلسل 'إش إش' والشخصية التي تقدمها وقالت: 'أكتر حاجة عجبتني في الدور أن 'شروق' رقاصة ومامتها وخالتها راقصات، هو العالم بتاعها دا لكن هي رافضاه وعندها طموح آخر، ولما حصلها مشكلة في حياتها فهي متربية في العالم دا ومتأثرة بيه جدا، حتى لبسها هو محافظ بس فيه الروح بتاعتهم مش بتلبس كطالبة جامعية، طريقة كلامها، كان ممكن تتغير لو الحياة أدتها الفرصة دي والموقف اللي حصل معاها بسبب أن هو استحلها عشان بتشتغل رقاصة مع أنها كانت رافضة دا ومتستاهلش اللي حصل فإحنا بنناقش أن مش لازم نحكم على حد من برا مش عشان بتشتغل كذا متكونش كويسة'.

ويعرض مسلسل 'إش إش' في تمام الساعة 10 مساء عبر قناة MBC مصر، والإعادة الساعة 3 عصرا، إلى جانب عرضه عبر منصة شاهد.

قصة مسلسل 'إش إش'

تدور أحداث مسلسل 'إش إش' حول فتاة ترث من والدتها الجمال والفقر تُدعى 'إش إش'، وتجد نفسها مضطرة أن تعمل كراقصة، وتدخل إلى عائلة الجريتلي عن طريق الصدفة، لتكتشف أن ما تمر به ما هو إلا امتداد لأسرار مدفونة داخل هذه العائلة.

أبطال مسلسل 'إش إش'

مسلسل 'إش إش' من بطولة مي عمر، ماجد المصري، انتصار، إدوارد، هالة صدقي، دينا، شيماء سيف، طارق النهري، عصام السقا، علاء مرسي، محمد الشرنوبي، ندى موسى، إيهاب فهمي، حمدي هيكل، أحمد عبدالله، وعدد من ضيوف الشرف وهم: محمد ممدوح، خالد الصاوي، كريم فهمي، محمد عبدالرحمن، أحمد زاهر، والعمل من تأليف وإخراج محمد سامي.