حرص الفنان سامح حسين على توضيح تصريحه الأخير عن الإجازات 'مش ضروري نأخذ كل الأعياد دي إجازات ورانا شغل كتير أوي'، وذلك بعد تعرضه لانتقادات بسبب ذلك التصريح، الذي جاء خلال مشاركته في احتفالية عيد الفطر.

وكتب سامح حسين عبر صفحته الرسمية في موقع التواصي الاجتماعي فيسبوك: 'جمهوري الحبيب .. كل سنة وانتم طيبين وبخير .. بناء على طلبكم .. والناس اللي طلبت تفسير لموضوع إني بطالب بإلغاء الأجازات في الأعياد .. الكلام ده طبعا غير حقيقي بالمرة .. أنا زيكم بحب الأجازة وبحب زيكم اشتغل بإخلاص زي كل واحد في مجاله'.

وأضاف سامح حسين: 'الأجازة دي نعمة من ربنا نشحن من خلالها قوتنا لمواصلة مشوار الحياة .. كل الموضوع إني اتمنيت إن أعياد مصر وأفراحها تزيد وتكتر وساعتها مش لازم ناخد الأعياد الجديدة دى كلها أجازة'.

وتابع: 'لكني لم أقصد أبدا إلغاء الاجازات الرسمية .. وعلى فكرة إحنا بنحب الأجازة علشان بنشتغل .. أي حد جرب قلة الشغل مش هيحب الأجازة .. الشغل نعمة ربنا يديمها علينا ويعين كل واحد على حاله ويكرمنا جميعا ويرزقنا الخير .. يارب حياتكم تكون كلها أعياد وفرحة'.

يذكر أن الفنان سامح حسين شارك في احتفالية عيد الفطر المبارك، التي أقيمت أمس الاثنين بحضور الرئيس عبد الفتاح السيسي.

واستطاع سامح حسين احتلال التريند مرات عديدة طوال شهر رمضان الماضي رغم غيابه عن الدراما التليفزيونية، ببرنامجه 'قطايف' الذي يقدم فيه نصائح حياتية عن القيم الإنسانية والروحية.