حكى المطرب رامي جمال عن كواليس تحضيره لألبومه الجديد 'محسبتهاش'.

وقال رامي جمال خلال لقائه في برنامج 'أجمد 7' مع جيهان عبد الله عبر إذاعة 'نجوم FM': 'سجلت 54 أغنية ونفذتهم بالآلات وكل حاجة واخترت منهم 15 أغنية منهم'.

وتابع رامي جمال: ' أشكر كل صناع الألبوم واعتذر للي معرفتش أنزل أغانيهم، أنا بحاول أعمل مستقبلي ولو كل واحد فيهم غنى هيفهم أنا نفسي الأغاني دي كلها تنزل وأنا صرفت عليها فلوس برضو وتعبت فيها وعارف أنكوا كمان نفسكوا تفرحوا بيها بس أنا شفت أن الأنسب في الوقت دا الأغاني اللي نزلت'.

وأكمل رامي جمال: 'إن شاء الله يارب الأغاني اللي منزلتش أعرف ألاقي ليها في الألبوم اللي جاي 5 أو 6 أغاني يتعملوا حلوين أوي أو أزود حاجة في التوزيع ويبقى قناعتي بيهم 100% فينزلوا وأنا أكيد مش عايز أرمي حاجة عملتها'.

ويضم ألبوم 'محسبتهاش' 15 أغنية تنقلت بين الرومانسية والدراما، وشارك في كتابتها وتلحينها مجموعة كبيرة من أبرز صناع الأغنية، فقد تعاون رامي جمال مع هاجر نبيل، أحمد المالكي، محمد النادي، محمد القياتي، بلال سرور، أيمن بهجت قمر، رضا المصري، عليم، حسام سعيد وغيرهم من الشعراء، بينما حملت الألحان توقيعات علي الخواجة، محمد خلف، مصطفى العسال، بلال سرور، فارس فهمي، سامر أبو طالب، ومحمد أنيس.