حل السيناريست عمرو محمود ياسين، ضيفا على برنامج 'بحب السيما' تقديم شريف نور الدين على 'ميجا إف إم' فى حلقة خاصة عن ذكرى وفاة الفنان محمود ياسين.

ومن أبرز تصريحات عمرو محمود ياسين عن والده الراحل:

مشوار الفنان محمود ياسين كان فيه تدريج مع تقدم وسائل العرض على الناس، بداية من المسرح اللى كان هوايته وقطع فيه شوط كبير، وما كانش فى دماغه السينما أو التليفزيون ساعتها

الفنان محمود ياسين كان بالنسبة له التمثيل يعني تقف على المسرح، دي كانت لغة جيله ساعتها وهو لما اتشاف على خشبة المسرح السينمائيين طلبوه

الفنان محمود ياسين كان عنده من الموهبة اللى قدر من خلالها يجمع مابين السينما والمسرح والتليفزيون والإذاعة

الفنان محمود ياسين لم يكن منشغلا بفكرة إنه يكون نجم، وكان يقولى دايما شغل ' النجمكة ' دي أنا ما بحبوش، وكان بيحب يتقال له الفنان أو الممثل محمود ياسين مش النجم

الفنان محمود ياسين كان أكتر حاجة بيهتم بيها فى أى عمل هى النص قبل أى حاجة تانية، وده معيار أى نجم ناجح

الفنان محمود ياسين كان بيعتز جدا بفترته على المسرح، وكمان مرحلة إدارته للمسرح القومى وعودة لافتة كامل العدد مرة تانية بعد سنوات وسنوات، ووقتها عمل مسرحيتين كسروا الدنيا ' أهلا يا بكوات ' و 'البهلوان'، وطبعا كان بيعتز بالأفلام الوطنية اللى عملها وأفلام تانية كتير زي الشريدة، انتبهوا أيها السادة، على من نطلق الرصاص، أين عقلى، الجزيرة، ومسلسلات زى العصيان وسوق العصر وغيرهم

جيل الفنان محمود ياسين كان محظوظ إنه يشتغل مع كوادر على أعلى مستوى، وكان كُتّاب السيناريو فى الوقت ده متعلمين بشكل مختلف، أما الأجيال الحالية مشوارهم بقى أسهل، لأن بقى عندهم فرصة يتشافوا وينجحوا بشكل أسرع، سواء من خلال السوشيال ميديا أو المنصات المختلفة.