كشفت النجمة سلمى أبو ضيف عن تفاصيل قصة حبها هي وزوجها إدريس عبد العزيز.

قالت سلمى أبو ضيف: 'قابلته المرة الأولى في دبي خلال تواجد عدد من الأصدقاء المشتركين، كنا عند بعض على Instagram، يبعت لي صورة يبعت لي نكتة، واضحك ويبعت لي كل سنة وانتي طيبة، بس ما نعرفش بعض، وكان عندي تصوير في دبي، وبعت لي قبلها بـ3 أيام حاجة ضحكتني أوي، كانت حاجة على شخصية (ربا) اللي انا عملتها، زي مقولة وكانت فعلا لايقة على الشخصية، قولت الواد دا شكله لذيذ ولا إيه؟ عجبتني النكشة اللي هو نكشها لي حبيتها'، حسب تصريحاتها في برنامج 'صاحبة السعادة'.

وأضافت سلمى أبو ضيف: بعت له أنا هنا في دبي، وكنت خارجة أنا وأصحابي وكلهم لغوا، كنا اتفقنا هنتعشى ومعايا 2 من صحابي ولغوا، وانا كنت عايزة اروح، هعمل ايه؟ وأنا بردو نازلة مع حد معرفوش اوي، فرضا في وسط الخروجة محبتش الموضوع، كلمت صاحبتي وجت معايا، وكانت تاني مرة أشوفه، ونزلت العشا مع صاحبتي، وبعد كدة مشيت، وقعدنا بقى أنا وهو نرغي نرغي نرغي، وبعد كدة قال لي (ها عايزة فرحنا فين؟)، فقولت له (إيطاليا)، احنا لحد دلوقتي معملناش الفرح اللي في إيطاليا دا.

واستكملت سلمى أبو ضيف قائلة: قولت له أنا داخلة الحمام، دخلت الحمام وبصيت لنفسي في المراية، في اللقطة دي حسيت إن أنا بحبه، حبيته في الحمام، بصيت لنفسي كدة وقولت إيه دا ايه اللي بيحصل دا، وبعدها قعدنا شوية ووصلني وتاني يوم كنت مسافرة القاهرة، سلم عليا وقال لي (أنا هجي لك مصر)، وبالفعل بعديها بأسبوعين جيه مصر، وقابل مامتي وقابل عيلتي كلها، وانا كنت كلمت باباه FaceTime، وكان أول مرة يجي مصر، هو مش مصري، من أب سوداني وأم سويسرية، وعايش طول حياته في سويسرا.

وعن لقائه بوالدته، قالت سلمى أبو ضيف: 'هو قابل مامتي والموضوع كان بيضحك، هو مكنش بيتكلم ولا كلمة عربي، وماما مابتتكلمش أي كلمة انجليزي، وأنا قاعدة في النص مترجم فوري'.

يذكر أن سلمى أبو ضيف لم تشارك في رمضان 2025 بعد نجاحها في رمضان 2024 في مسلسل 'لأعلى نسبة مشاهدة'، وذلك لانشغالها بابنتها المولودة صوفيا.

وكانت سلمى أبو ضيف وضعت ابنتها صوفيا في بداية فبراير 2025.

ذكر أن سلمى أبو ضيف احتفلت بعقد قرانها على خطيبها إدريس عبد العزيز الأربعاء 12 يونيو 2024، واقتصر حضور عقد قران سلمى أبو ضيف على عدد من الأهل والأصدقاء والمقربين بمنزلها.

قالت سلمى أبو ضيف خلال لقائها مع الإعلامي معتز الدمرداش في برنامج 'ضيفي' المذاع عبر قناة الشرق للأخبار: 'قصة الحب بدأت في دبي، وكل حاجة حصلت بالصدفة والنصيب'.

أضافت: 'إحنا إتجوزنا وقلنا لو إن شاء الله الظروف سمحت هنعمل فرح، وإحنا ماشيين حسب الظروف وهو مشغول وأنا مشغولة'.

وتابعت: 'كنا عايزين نتجوز وبنحب بعض، والحفلة ممكن تتعمل في أي وقت السنة اللي جاية أو اللي بعدها مش فارقة، هي حفلة في الأول

والآخر لو ربنا قدرنا نعملها بالشكل اللي عايزينه هنعملها، الفرح حاجة تقليدية'.