خاص ياسر جلال لـ(في الفن): "جودر" عمل عالمي مش هكرره تاني ومش هنسى اللي عملته هنادي مهنا في المغرب وأفضل تكريم للفنان أن يظل يعمل حتى آخر عمره

النجم ياسر جلال كان مفاجأة رمضان الماضي، بمسلسله 'جودر' الذي أعاد به تقديم عالم 'ألف ليلة وليلة' بعد غياب عن المشاهدين سنوات طويلة، نجاح العمل كان كبيرا على جميع مستوياته الفنية من نص جذاب مكتوب بحرفية شديدة، إلى تمثيل واختيار كاست مناسب متناغم، إلى إخراج وأعمال مونتاج وجرافيكس مبهرة.

مع عرض الجزء الثاني من المسلسل في رمضان هذا العام، تحدثنا مع النجم ياسر جلال عن تفاصيل المسلسل، لماذا تم عرضه على جزأين، وحكى لنا أصعب المشاهد التي تم تنفيذها، كما تحدث بشجن عميق عن الفنان الراحل صالح العويل وما دار بينهما قبل الرحيل، وقراره باقتحام عالم السوشيال ميديا بعد سنوات من الابتعاد عنه ... في هذا الحوار:

هل كان عرض مسلسل 'جودر' على جزأين رغم الانتهاء من تصويره في رمضان الماضي في صالح العمل؟

عرض مسلسل 'جودر' على جزأين كان قرار الشركة المتحدة، وطبعا صالح العمل أن يتم تقديمه على أكمل وجه، سواء تم عرضه على جزء واحد أو اثنين، المهم أنه يكون صالحا للعرض، انتهى تصويره وانتهت أعمال الجرافيكس والمونتاج على أكمل وجه، لتحقيق الأثر المطلوب في المتلقي.

هل تم تعديل 'جودر' بعد قرار تقسيمه لجزأين عشان نحس إننا قدام جزء ثاني من 'جودر'؟ أم سيكون استكمالا للحلقات؟

لا المسلسل استكمال للحلقات السابقة التي تم عرضها في الجزء الأول، لم يتم إجراء أي تعديل في الأحداث، لكن الأحداث كانت تسمح أن نقف عند نقطة ساخنة، وهو ما حدث، ونرجع نكملها في الجزء الثاني، ونكمل باقي أحداث المسلسل.

هل نجاح المسلسل ممكن يشجعك لتقديم سلسلة من 'الف ليلة وليلة' أو أعمال تاريخية أخرى؟

أفضل أن أقدم حاجة جديدة، لون جديد، وأترك زملائي يخوضوا نفس التجربة، لأنني أحب التنوع في أدواري.

تفتكر ليه تم اختيار 'جودر' تحديدا من بين الدراما المصرية ليتم دبلجته بالروسية وعرضه على منصة عالمية؟

لإن الموضوع عالمي، 'ألف ليلة وليلة' تراث عربي عالمي، الجماهير في مختلف دول العالم بتحب تتفرج على حواديت 'ألف ليلة وليلة' زي 'علاء الدين' و'السندباء' وغيرهم كتير، و'جودر' كان حدوتة جديدة لم يتم تقديمها من قبل، والأستاذ أنور عبد المغيث أضاف لها أحداث جديدة وخطوط درامية ومختلفة غير موجودة في القصة الأصلية، وهذا اللون من الأعمال مرحب به في العديد من دول العالم.

ولم يتم تقديمه للروسية فقط، فقريبا سيتم تقديمه على منصة صينية هتعرضه إن شاء الله.

احكي لنا مواقف مش هتنساها من كواليس 'جودر'

طبعا 'جودر' مليان بأحداث لن تنسى لأن أحداثه كتير قوي وشخصياته كتير قوي، لكن يحضرني الآن موقف حدث أثناء التصوير في المغرب فوق قمة أحد الجبال في منطقة اسمها 'أقشور'، وكان معايا الزميلة هنادي مهنا، وهى زميلة عزيزة ونجمة جميلة، وكنا بنصور في درجة حرارة 4، ونزلت هي في بحيرة صغيرة وشلال، وكانت فعلا هتتجمد من البرد، لكنها وقفت بمنتهى الشجاعة والقوة ومثلت المشهد، وكانت صعبانة عليا جدا، أنا بحترمها جدا وبحييها لأنها من النجمات المتميزات جدا اللي انا شخصيا بحبهم وبقدرهم، وأنا بشكرها على إنها اصرت على تصوير المشهد في الطقس الصعب ده، كل التحية والتقدير للفنانة هنادي مهنا.

كلمنا عن علاقتك بالفنان الراحل صالح العويل

الفنان الراحل صالح العويل فنان كبيير اشتغلت معاه زمان في مسلسل اسمه 'أبناء دهشان' وبعدها بسنتين التقيت معاه في مسلسل تاني اسمه 'سعد اليتيم' وده كان في بداية عملي في الفن، وبعدين اختفى تماما لحد ما قريت له حوار صحفي قال فيه انه نفسه يشتغل معايا.

تواصلت معاه وحييته وسلمت عليه وطلب مني نفس الطلب تاني، ووعدته انه هيحصل، وكلمت المخرج الأستاذ إسلام خيري ورحب بالفكرة، لكن بعدها دخل المستشفى ورحت زورته واطمنت عليه وقلت له شد حيلك عشان انت معانا في لمسلسل، والحمد لله ده كان له أثر طيب على حالته النفسية اللي انعكست على حالته الصحية واتحسنت، وانتظرته لحد ما قام بالسلامة، وجه صور معانا في 'جودر' وكان سعيد جدا، وأنا كنت في قمة السعادة إني شايفه فرحان.

لكن بعدها بفترة دخل المستشفى مرة ثانية، ورحل الله يرحمه ويحسن اليه ويغفر له ويسامح ويسكنه فسيح جناته، ملحقش يتفرج على نفسه في المسلسل، لكن كل التقدير والحب للفنان صالح العويل اللي قدر من خلال أدواره صغيرة المساحة اللي كان بيقدمها في الأفلام إنه يترك أثر زي الأبطال بالظبط.

شايف إزاي ممكن نكرم فناني الصفوف (الثالثة والرابعة) الكبار بشكل يوفر لهم حياة كريمة في أيامهم الأخيرة؟

أنا شايف ان مافيش فنان اسمه صف أول وصف تاني وصف ثالت وصف رابع، كلنا مهمين للعمل الفني، كلنا مفيدين للعمل الفني، كلنا بنكمل بعض، كلنا فريق، وكل فنان وله احترامه، وأنا شايف إننا لازم نلجأ للفنانين المحترفين أعضاء النقابة، اللي بيمثلوا بقالهم فترة، والتمثيل مصدر رزقهم الوحيد، ولازم ننتبه لهم ونطلبهم في الأعمال، وده هيكون خير تكريم نقدر نقدمه للفنان، إنه يفضل يمثل ويفضل يشتغل.

إيه سبب ابتعادك عن السوشيال ميديا رغم أهميتها؟

أنا معرفش حاجة عن السوشيال ميديا، ومعرفش إيه اللي يتحب فيها وإيه اللي ميتحبش، وعمري ما اتعاملت معاها في حياتي، ومعنديش أي حسابات على أي منصة.

لكن فى الفترة الأخيرة كتير من أصدقائي الفنانين والإعلاميين نصحوني إني لازم يكون ليا تواجد على السوشيال ميديا وأعمل حسابات موثقة رسمية عشان الصفحات المزيفة تتقفل، وأنا بصراحة حاسس إن جمهور السوشيال ميديا دايما واقف جنبي كل سنة بعد ربنا وبيدعمني بشكل كبير رغم عدم وجودي بينهم، فقررت إني لازم اتواصل معاهم بنفسي، وقريبا جدا هيكون ليا تواجد على السوشيال ميديا ان شاء الله.