فيديو - نشوى مصطفى لـ"كلم ربنا": نمت مكان جوزي في القبر عشان أشوف هيحس بإيه!

حلت الفنانة نشوى مصطفى ضيفة على برنامج 'كلم ربنا .. مع أحمد الخطيب)، الذي يقدمه الإعلامي أحمد الخطيب على الراديو 9090، وتحدثت عن رحيل زوجها، والفترة الصعبة التي مرت بها.

قالت الفنانة نشوى مصطفى عن وفاة زوجها: أصعب لحظة في حياتي لما دخلت القبر علشان أدفن زوجي اللي راح مني وسابني بعد عشره 33 سنة، مكنش مريض ولا بيشتكي من حاجه، فجأه تعب بالليل، خدته في حضني ومات على كتفي، وشوفت بعيني روحه وهيا بتطلع، بعد ما استقبل القبلة ونطق الشهادتين، ومشي في سلام!

وأكملت: جوزي عُمره ما اشتكي من تعب ولا دخل مستشفي أو راح لدكتور، علي عكسي أنا اللي عملت 3 عمليات في القلب

وحالتي الصحيه فيها مشاكل، يعني اللي المفروض بموت أنا مش هو، وعلشان كده كنت منتظره يومي، مش يومه!

ووصفت اللحظات الأخيرة في حياته قائلة: جوزي وهو بيموت في حضني كان بينادي بصوت عالي علي ربنا ويقول يارب ومرة واحده بص ناحية القبلة بابتسامة وكأنه شايف حاجة جميلة قدامه، ولحظة خروج روحه كانت صعبة، لكن شفت فيها جمال وراحة.

وواصلت: قبل الدفن رحت المقابر، واستأذنت إني أنزل أشوف مكانه، شمّيت ريحة مسك جميلة، ونمت مكانه جوه التربه عشان أشوف هيحس بإيه!

وأضافت: المقبرة كانت واسعة، وناس كتير حضرت الدفنة رغم خوفي إن محدش يجي، لكن حسّيت إنه رايح مكان أحسن.

وعن لعاقتها بزوجها الراحل قالت: جوزي كان أعظم وأحنّ راجل في حياتي، اتجوزنا من 33 سنه، كان فيها كل حاجه، صديقي وأبويا وأخويا وحبيبي وسندي وضهري، ولحد دلوقتي لسه موجود معايا، ممتش، بيكلمني وأكلّمه، ريحته لسه في سجادة الصلاة بتاعته وأنا بصلي عليها، لمّا بخرج من البيت بستأذنه، ولمّا برجع بنادي عليه واقوله: ياعماد أنا رجعت!

أنا اتولدت واتربيت في شبرا، أزهريه وحافظه القرآن، عشت حياة بسيطة، أبويا كان شغال سواق في المصانع الحربية، ووداني الكُتّاب عشان أحفظ القرآن، كنت شاطرة جدًا وطلعت الأولى على الجمهورية في الشهادة الابتدائية الأزهرية، وفي الثانويه دخلت مدرسة جمعية الإيمان الأرثوذكسية المسيحية.

إحنا خمس إخوات، أنا الكبيرة بينهم، أمي وأبويا كانوا بيعملوا جمعيات علشان يصرفوا علينا في المدارس والمجموعات.

واشتغلت في العتبة بيّاعة في محل ملابس وأنا في الجامعة، كنت بكسب من عرق جبيني ، وعلشان بحب التمثيل قررت أدخل معهد الفنون المسرحية، لكن أبويا رفض وقاللي إن ده هيأثر على تعليم إخواتي، فقررت أبيع سندوتشات في العتبة على زمايلي البياعين،

الدرس اللي فهمته في محنة وفاة زوجي هو إن ربنا هو سندي الحقيقي، الواحد الأحد، جوزي هو وسيلة ربنا في حياتي ، ودلوقتي أنا متونسه بربنا، الكل يذهب ويبقي الله .. هو الباقي!