يسرا اللوزي تكشف تفاصيل إصابة ابنتها بمرض السكري

كشفت الفنانة يسرا اللوزي عن إصابة ابنتها الكبرى 'دليلة' بمرض السكري، وحكت كيف اكتشفت إصابتها المرض وطريقة تعاملها معها.

وقالت يسرا اللوزي خلال لقائها ببودكاست 'Diabetips Talks': 'وقت الكورونا لما المدارس كانت أونلاين كنا في يناير في الشتاء لاحظت فجأة أن 'دليلة' بتخلص إزازة الماية بتاعتها بالليل وتقوم تملاها، وكانت اختها لسه بيبي كان في حاجة مش متأكدة منها كنت فاكرة أنها غيرانه، كان في مرحلة فجأة بتتعصب جدا وهي كان عندها 6 سنين ونص، كنا نبقى برا وتقولي شيليني مش قادرة وتتعصب وكنت فاكرة أنها بتلفت نظر وعايزة تاخد الاهتمام من أختها لكن ركبت الحاجات مع بعض، أنا عارفة أن السكر العالي بيعصب والسكر الواطي بيهبط، حطيت كل دا مع بعض قلت ممكن يبقى عندها السكر'.

وتابعت يسرا اللوزي: 'خبرتي في السكر جايه من جوزي كان عنده سكر من وهو عنده 10 سنين وكان حكالي اللي حصله، لما سمعت تجربته ومن العيشة معاه بقيت عارفة فعرفت الأعراض بسرعة'.

وأكملت يسرا اللوزي: 'دا كان قبل ما أسافر لتركيا عشان أصور حاجة، كنت هاخد 'نادية' عشان لسه صغيرة وبترضع وهسيب 'دليلة' مع باباها وبابايا وكانوا هيسافروا مكان على البحر، قبل ما أسافر بيوم قلت لجوزي إني شاكة أن 'دليلة' عندها السكر مكنش مقتنع بس قلتله لما تقعد وتركز معاها هتاخد بالك، سافرت وبعد 24 ساعة ولقيته بيكلمني وباعتلي صورة وهي وهو مركبين جهاز قياس السكر وقالي إن كان معايا حق'.

أكملت يسرا اللوزي: 'اللي خلى الموضوع أسهل على 'دليلة' أن هي شافت باباها بياخد الحقنة، دا سهل الموضوع عليها، بس كان عندنا ضغط نفسي علينا لأن 'دليلة' عندها مشاكل تانية كتير موضوع السمع فهي مش ناقصة كنا قلقانين على نفسيتها ونفسيتنا وكنا مش عارفين أن طفلة في السن دا تبقى مدركة هتاكل إيه وبقينا مركزين أوي مش بنعرف ننام بالليل بعمق وبقى في حالة تأهب ودا متعب جدا، دا غير موضوع الأكل وأي مكان بتروحه بيبقى معاها أكلها ولام أعرف أتعامل معها كويس عشان نفسيتها'.

يذكر أن يسرا اللوزي شاركت في موسم رمضان 2026 بمسلسل 'كان ياما كان'.

'كان ياما كان' مسلسل دراما اجتماعية، يشارك يسرا البطولة النجم ماجد الكدواني من تأليف شيرين دياب وإخراج كريم العدل وإنتاج ماجيك بينز للمنتج أحمد الجناينى وبطولة عارفة عبد الرسول وريتال عبد العزيز.