مي عمر تتهم أحد المخرجين بالتناقض بعد احتفاله بالترند

أحدثت الفنانة مي عمر ضجة على مواقع التواصل الاجتماعي بعد نشرها منشورًا عبر حسابيها على 'فيسبوك' و'إنستغرام'، وجهت فيه انتقادات حادة لأحد المخرجين من دون ذكر اسمه صراحة، مشيرة إلى موقف متناقض له بشأن موضوع تصدّر الترند.

مي عمر: الترند كان وحش في رمضان.. بقى جميل دلوقتي؟

كتبت مي عمر في تدوينةٍ لها شاركتها عبر خاصية 'ستوري' في حسابها على 'إنستغرام' وحسابها الشخصي في 'فيسبوك' أيضًا: زميل (مش ممثل)، وكنت بعتبره صديق، كتب في رمضان بوست بيتريق فيه على الناس اللي بتفرح وتشارك إنها ترند رقم واحد، وقال إن الترند مش هدف الشغلانة وإننا بنشتغل عشان الفن مش الأرقام… كلام تنظير وفزلكة على أعلى مستوى.

وأشارت مي إلى أنها اختارت الصمت في البداية، قائلة: وقتها ما ردتش، وقلت أسيب الأيام تكشف، لأني كنت عارفة إن عنده مسلسل هيتذاع أوف سيزون، وأول ما يقرب من أي ترند حتى لو دخل رقم عشرة نص ساعة، هيبقى مش مصدق نفسه ويشارك باحتفال كبير كأنه فتح القدس.

وأضافت مي ساخرة: وفعلاً… أول ما مسلسله دخل التريند، بقى بيشارك فرحان إنه رقم واحد. الله! هو الترند كان وحش في رمضان وبقى جميل دلوقتي؟.

مي عمر توضح موقفها

رغم اللهجة النقدية، أوضحت مي عمر أنها لا تمانع فرحة أي شخص بنجاحه، قائلة: أنا مش ضد إن أي حد يفرح بنجاحه، بالعكس مبروك ومن حقك تفرح وتشارك لأن ده تعبك ومجهودك. لكن ياريت نبطل المنظر بتاع: (أنا مختلف… أنا فوق الترندات) وبعد كده أول ما نقرب منها نطير من الفرح وننشر 20 ستوري.

تساؤلات وانتقادات

تابعت مي عمر تساؤلاتها منتقدة الازدواجية في المواقف: عارفة إن أي حد يعرفني هيستغرب من كلامي لأني عمري ما رديت على حد. بس ليه إحنا شطار جدًا في إننا نحرّم على غيرنا حاجة، ولما تيجي في ملعبنا تبقى فجأة أحلى حاجة في الدنيا؟.

رسالة ختامية

اختتمت مي عمر منشورها برسالة واضحة: في الآخر… الترند مش هدف، غير لما يبقى معانا!.

وأضافت: كلامي مش موجه لأي نجم من المشاركين في العمل، بالعكس أنا بقدّرهم وباحترمهم علشان ماحدش يفهمني غلط.

مشاركة مي عمر الرمضانية

يُذكر أن مي عمر شاركت في موسم رمضان الماضي من خلال مسلسل 'إش إش'، إلى جانب ماجد المصري وهالة صدقي، والعمل من تأليف وإخراج محمد سامي. وقد حقق المسلسل نجاحًا لافتًا وتصدر قوائم البحث خلال فترة عرضه.