ميدو عادل: "الفن" أجمل حاجة ربنا خلقها وبنتي هتمثل قدامي لأول مرة

أعرب الفنان ميدو عادل عن سعادته بمشاركة ابنته حياة له لأول مرة في عمل مسرحي، من خلال عرض 'إجازة سعيدة'، مؤكدًا أن التجربة تمثل له لحظة خاصة على المستويين الفني والأسري، خاصة أنها أول تجربة تمثيلية لها على خشبة المسرح.

وقال ميدو عادل خلال حلوله ضيفًا في برنامج 'سبوت لايت' الذي تقدمه الإعلامية شيرين سليمان على قناة صدى البلد: 'بنتي حياة أول مرة هتمثل معايا في عرض مسرحية إجازة سعيدة، وكنت بدعي وبقول يا رب ولادي يطلعوا فنانين، لأن أجمل حاجة ربنا خلقها في الدنيا هي الفن، فاتمنى ولادي يطلعوا فنانين لأن فنانين يعني بني آدمين حقيقيين وربنا يقدرهم'.

وأضاف: 'حياة بنتي من بدري نفسها تمثل، والحمدلله هتبقى معايا في المسرحية وبتعمل دور بنتي، ويا رب تكون موفقة في المسرحية، ومبسوط إنها وسطنا كلنا'.

وتابع ميدو عادل مشيرًا إلى تشابه التجربة بينه وبين ابنته قائلًا: 'المشابه مع حياة بنتي إنها أول مسرحية هتعملها هتبقى معايا، وأنا كمان أول مسرحية عملتها في حياتي كان عندي 3 سنين ومثلتها مع والدي وكنت طالع ابنه برضه'.

وكشف ميدو عادل عن تفاصيل مسرحيته الجديدة 'إجازة سعيدة'، موضحًا أنها تنتمي إلى نوعية الفانتازيا الاجتماعية الواقعية التي تمزج بين الخيال والواقع في إطار إنساني قريب من الجمهور، وتكشف أن مش دايمًا التغيير بيبقى حلو، وخلال الرحلة دي هما بيعرفوا نفسهم أكتر.

وأكمل: 'مسرحية إجازة سعيدة فيها شوية فانتازيا ولكن فانتزيا اجتماعية واقعية، وفيها ناس حقيقيين كتير، يعني الأربع أسر اللي بيظهروا هما 4 شباب في الشغل مع 4 زوجات وأصدقاء بيسافروا دايمًا مصيف وبيقضوا الإجازة السعيدة'.

وأردف: الأربع أنماط مختلفين، ولكن فيهم حتة من مجتمعنا المصري الوسطي، وكلهم شخصيات طيبة ومسالمة جدًا، وبيقابلوا أحداث في المصيف بتغير لهم حياتهم.