نجوى كرم: نحنا عنّا أحلى وطن ومن قلّة حُبّنا.. ضيّعناه

بعد مرور عام على إنفجار مرفأ ​بيروت​، نشرت الفنانة اللبنانية ​نجوى كرم​ أغنيتها 'بيروت' التي طرحتها العام الماضي في صفحتها الخاصة على موقع التواصل الإجتماعي.

وأرفقت تعليقاً قالت فيه: 'في ناس ما عندا بلاد، من حُبُّن، عملوا أوطان نحنا عنّا أحلى وطن، ومن قلّة حُبّنا.. ضيّعناه'.

كما أعادت نشر فيديو في حسابها كانت نشرته عقب الإنفجار، وجهت فيه رسالة قاسية للطبقة الحاكمة، قائلة :'كأنو ما صار شي ومبلا صار وكتّر.. دبحتونا ودبحتو البلد متل كأنو ما صار شي، طفيتو أهدافنا وأحلامنا والبكرا تبعنا، ومتل كأنو ما صار شي، هجرتو ولادنا وأدمغتنا ومتل كأنو ما صار شي، نهبتونا وسرقتونا وفلستونا متل كأنتو ما صار شي، وقال شو وبكل وقاحة قالولنا بكرا بيتعودو، ولك يعودكن العمى أقلا شي، مش ملككن نحنا ..ولا محط تجاربكن وحقل لتحقيق أمنياتكن ..ولك لازم ثورة تفوت عبيوتكن تتحسسكن بيلي عم نحسو.. هيدا إذا كان عندكن أساسا فيه احساس يا أولاد الأفاعي.. شغلتو فينا المستشفيات وأطبا النفس.. خليتونا ميتين ونحنا أحياء يا بلا وجدان.. ولك وين ريحة الطيون والزعتر يلي بدلتوها بريحة جتت ولادنا وأهالينا.. وبعدكن عم تتقاتلو عالسلطة؟!! ولك روحو انقبرو فلّو... صاير ومكتّر صاير ومكتّر..بس إنو كأنو الدني عم تشتي.. كيف قادرين تستخفو فينا؟! كيف قادرين تستخفو بعقولنا وأرواحنا؟! مش عم نفهم كيف؟ إذا انتو مش فاهمين مصيبة، وإذا انتو فاهمين مصيبة أكتر'.