محمد محمود: بدأنا التحضير للجزء الثاني من "أشغال شقة"

كشف الفنان محمد محمود عن بدء التحضير للجزء الثاني من مسلسل 'أشغال شقة'.

وقال محمد محمود خلال لقائه مع الإعلامية إنجي علي عبر إذاعة وقناة 'نجوم FM في برنامجها 'نجوم رمضان أقربلك': 'إحنا بنتكلم دلوقتي في الجزء اللي جاي وبدأنا نفتح أن ممكن يبقى 'دكتور غندور' دكتور في تخصصات إيه تاني، إن شاء الله في جزء تاني وهيخلوا شخصية الدكتور رئيسية'.

وتحدث محمد محمود عن شخصية 'دكتور غندور' قائلا: 'الورق هو الأساس أستاذ خالد دياب وشيرين دياب عاملين معادلات كيميائية، ومن أول مشهد بنصوره قالي أنا عايز كوميديا مش بنهرج فيها مش بنقول نكت ولا بنقول إفيهات، أنا صدقت الشخصية اللي بعملها وبقيت متخيل إن الكلام دا بجد وبقى بيجيلي كريزة ضحك في التصوير والمخرج أفتكر إني بتعاطى حاجة وسألني أنت شارب إيه قلت له إني مش بقدر حتى اشم ريحة حاجة، الفكرة إني مصدق اللي بيتقال وكنت مستمتع بالشخصية رغم إنها مش كبيرة أنا بعتبره ضيف شرف'.

وتابع محمد محمود: 'كان في جروب دكاترة على السوشيال ميديا كانوا بيسألو دا تخصص إيه ودكتور صديقي قالي الحمد لله إنك مش تخصص روماتيزم قلت له هعمله في الجزء التاني'.

وقدم محمد محمود شخصية 'دكتور غندور' المتخصص في أكثر من مجال طبي، حسب اليوم في الأسبوع في يوم يكون دكتور أطفال ويوم آخر دكتور قلب ويوم آخر مخ وأعصاب وغيرها من التخصصات.

وتكون مسلسل 'أشغال شقة' من 15 حلقة وعرض في النصف الأول من رمضان 2024.

ومسلسل 'أشغال شقة' من بطولة هشام ماجد، أسماء جلال، شيرين، سلوى محمد علي، مصطفى غريب، وعدد من ضيوف الشرف منهم إنتصار وإيمان السيد ونهى عابدين وإنعام سالوسة ومن تأليف خالد وشيرين دياب، وإخراج خالد دياب.