تامر حسني لجمهور حفله بالكويت: هتقوني عشان أعرف أغني أنتوا عارفين الظروف

أحيا الفنان تامر حسني حفلا غنائيا مساء الجمعة، 13 يونيو في الكويت، ووجه رسالة لجمهوره ليشكرهم على اهتمامهم بالسؤال على ابنه آدم والدعاء له.

وقال تامر حسني في فيديو انتشر له من الحفل: 'أنتوا هتقوني عشان أعرف أغني أنتوا عارفين الظروف طبعا'.

وتابع تامر حسني: 'بشكر كل حد فيكوا وكل حد على السوشيال ميديا دعا لابني ربنا يحفظكم يارب وليكم مثلها وأضعاف كمان، وأنا هبدأ معاكم الحفلة أنا عارف أن ملكوش ذنب في أي حاجة '.

وكان تامر حسني كشف عن تطورات حالة ابنة 'آدم' الصحية وكتب عبر حساباته في مواقع التواصل الاجتماعي: 'لكل الغاليين اللي اهتموا بتعب ابني الحمدلله الوضع مستقر بعد العملية التانية وخرج من العناية المركزة بفضل الله ثم دعواتكم اللي لو عشت أشكركم عمري كله مش هوفي حقكم وربنا يتمم الشفاء على خير، ودايماً بقول على دعواتكم الكريمة: لكم مثلها وأضعاف أضعافها. شكراً يا أغلى الناس ربنا يحفظكم. ويحفظ ولادكم قادر ياكريم'.

وكان تامر حسني كشف تفاصيل الوعكة الصحية التي تعرض لها نجله، وكتب عبر حسابه بموقع Facebook: 'أنا مش عارف أشكركم إزاي على كمّ الدعوات اللي دعيتوها لربنا لشفاء آدم ابني اللي جاتلي منكم هنا و على تليفوني و تليفونات كل المحيطين بيا هو عمل عمليتين كبار بسبب انفجار الزايدة المفاجئ، اللي كانت أعراضه سخونية عادية بس، وبقولكم كده عشان تبقوا حريصين مع نفسكم أكتر ولولادكم، ومش كل سخونية تقولوا ده شوية برد وخلاص لا روحوا اكشفوا كويس، واعملوا سونار على البطن والزايدة مرة و٢ عشان برضو ساعات مش بيبان، ولازم الدكتور يضغط بطريقة معيّنة، تقريباً أقوى شوية عشان يعرف، لإني سمعت كتير اليومين دول إن الزايدة خادعة'.

وتابع تامر حسني: 'اطمنوا كذا مرة قبل لحظة انفجارها عشان بجد مشاكل بتحصل بعدها كبيرة ومحزنة أوي، وحبيبي آدم عمل عمليتين صعبين أوي عليه وبدعواتكم مستنيين النتايج تكون خير يارب ويعدي مرحلة الخطر يارب، بحق كن فيكون، اشفيه وعافيه، هو وكل ولادنا، بس هو راجل وهيتحمل وإن شاء الله ربنا يكرمه و يعافيه و يحفظه هو و إخواته و يحفظ كل ولادكم يارب.