تامر حسني يوّجه رسالة إلى جمهوره وهذا ما قاله لبسمة بوسيل في عيد الأم

تامر حسني

نشر الفنان تامر حسني عبر حساباته المختلفة على مواقع التواصل الاجتماعي منشورًا وجه من خلاله رسالة إلى جمهوره بمناسبة عيد الأم.

وكتب تامر قائلاً: '‎جمعة مباركة يا أغلى الناس النهاردة بكتبلكم بوست عن الأم ونفسي من جوة قلبي تقروه من أخ لإخواته وناتج من تجربة حقيقية بيني وبين أمي هحاول اختصره لأن الكلام عن الام يحتاج كُتب كتير'.

وتابع تامر: 'هبدأ كلامي بإن اكتر موقفين في عمري زعلت فيهم هما اللي كنت معاندها في الرأي وكل الناس كانت في كفة وهي لوحدها في كفة، أقسم بالله الأم بتشوف وبتحس اللي انت متعرفش تحسه،، إوعى تقول انا خلاص كبرت ومش هاخد رأيها والله والله بيبقى عندك دليل وحد بيطمنك أو بينبهك من مستقبل الموقف وأنت مش عايز تسمع وفاكر إن هي مش مواكبة الدنيا فهيكون رأيها راجعي تفتكر ربنا هيخلق قلب أم له فترة صلاحية يعني بيحس لفترة محدودة !!!؟ أكيد لا مركز إحساسها ممدود لآخر العمر في حاجة جواها بتقولها يا آه يا لأ. صدقوها'.

واستكمل كلامه: 'أفتكر مرة زمان أمى فضلت تقولي على واحد صاحبي إنه مش كويس وغدار وحقود أنا فضلت أقولها حرام عليكي دا أحسن واحد في صحابي وأدافع عنه باستماتة لحد ما الأيام دارت وفعلاً خرج منه الجرح الكبير والحقد الكبير اللي ميطلعش من إنسان بيكرهني أصلاً وعرفت ساعتها إن في ناس حوالينا لابسين قناع الحب لحد ما المصلحة هتروح وبعدين يبان وشهم الحقيقي فعلمت نفسي متعشمش أوي في الناس عشان لما يغدروا متعبش أوي والناس الطيبين بجد أكيد هيبانوا ويبهرونا بحبهم وثباتهم الطويل اللي مش مشروط ولا قائم على مصلحة يعني برضو مش هنظلم حد كويس بس هنلغي فكرة التسرع في العشم الزائد'.

‎وأضاف: 'هاجي بقى لنقطة نفسية غريبة أنا كل ما تكون إيد أمي على راسي والله والله والله بحس لو تعبان إني مرتاح لو مهموم إني مبسوط وكأنها بتشفط وبتسحب أي طاقة سلبية مش كويسة وتحطلي طاقة جميلة كلها خير وراحة'.

‎الأيام اللي غصب عني مش بعرف أشوفها فيها بكون متوتر قلقان ولما بشوفها بقول في سري أنا بحمد ربنا عشان اتولدت لقيت الست دي أمي'.

وأكمل تامر منشوره قائلاً: '‎يلا نوريهم قد إيه بنحبهم واللي مزعل أهله يروح فوراً يصالحهم يلا عندك سبب جميل أهوه جه من عند ربنا متخافش روح صالح ربنا هيكون معاك وهيخليك مجبور الخاطر صدقني….. وأكيد أتمنى لو يفضل ده شكل علاقتنا بيهم طول الحياة مش بس في عيد الأم، كل سنة وإنتي طيبة يا أمي'.

‎ووجه كلامه لطليقته الفنانة بسمة بوسيل قائلاً: 'كل سنة وانتي طيبة يا بسمة وكل سنة ووالدتك الجميلة طيبة … انا كل يوم يا بسمة بحكي لولادنا عن الأصول دي ومصورلهم كل تعبك معاهم من وانتي لسة هعدي عصبيتك عليا في الوقت ده مش مشكلة حقك المهم مصورلهم مجهودك لحظة بلحظة عشان يعرفوا انتي وانا تعبنا عشانهم إزاي ولما يكبروا إن شاء الله هما يعملوا كده مع ولادهم، وكمان يراعوا ربنا فينا لما إحنا نكبر أوي.. ان شاء الله هتشوفي فيهم كل الخير عشان إنتي أم جميلة ومخلصة ليهم قدام ربنا .. كل سنة وكل أم في الدنيا طيبة ويلا ندعي لكل أم مش معانا ربنا يرحمها ويرفع من قدرها في الجنة'.