خاص خاص- أحمد شاهين لـ"في الفن": الناس شتمتني في رسايل على فيسبوك بسبب "عصفور" في "بنج كلي" و"كره" الشخصية دليل نجاح

أطل الفنان أحمد شاهين على الجمهور بشكل مختلف في مسلسل 'بنج كلي'، فبعدما اعتاد الجمهور منه على الأدوار الكوميدية، كان هو مصدر الشر والخطر في العمل.

دكتور 'عصفور' من المشهد الأول لظهوره ويتسأل الجمهور حول السر ورائه، نظراته ابتسامته الهادئة للدكتورة 'دعاء' سلمى أبو ضيف والماضي بينهما، ثم تتطور الأحداث ونراه يتدخل في أمور كثيرة ويثير الشكوك إلى أن تنتهي الحلقة التاسعة بمفاجئة حول شخصيته.

تواصل FilFan.com مع الفنان أحمد شاهين ليحدثنا عن المسلسل وكواليس التحضير لـ'عصفور' وتعليقات الجمهور التي لن ينساها.

في البداية كشف لنا أحمد شاهين كواليس مشاركته في المسلسل وقال: 'لما كلموني قالولي هتعمل دور دكتور 'عصفور' في مسلسل 'بنج كلي' وأنه إخراج أستاذة نادين خان مترددتش لحظة مخرجة كبيرة وعظيمة وشغلها بيتكلم عنها واتشرف إني في سيرتي الفنية يكون في عمل من إخراجها، ولما عرفت أنه بطولة سلمى أبو ضيف ودياب نجوم كبار وأحب اشتغل أكيد اشتغل معاهم، والكواليس كانت جميلة'.

يقدم أحمد شاهين خلال أحداث مسلسل 'بنج كلي' دور طبيب التخدير 'عصفور' وتحدث عن تحضيره للدور قائلا: 'كان في دكاترة تخدير قعدت معاهم واتناقشنا في حاجات كتير ليها علاقة بالمهنة، فهمت منهم حاجات وفادني جدا في بناء تاريخ الشخصية، إني أشوف 'عصفور' دا ممكن يكون من أسرة عاملة إزاي وإيه وصله لأنه يعمل كده يبقى 'مدمن' هل تعرض لضغوط، الفنان أثناء التحضير لي دور لازم يبني تاريخ ليها.

كان لـ'عصفور' تصرفات مريبة جعلت الجمهور يتفاعل مع الشخصية ويبني التوقعات حولها، وعن أكثر التعليقات التي أعجبته قال أحمد شاهين: 'كنت مبسوط جدا من تعليقات الجمهور من أول مشهد، ناس وقفتني في الشارع بتقولي ملكش دعوة بـ'دكتور دعاء' و'ميس نادية'، لما الموضوع بيوصل للناس ويكونوا مصدقين دا معناه إننا وصلنا، مش هبقى مبسوط لما الشخصية تتكره أو أنا اتكره، بس أنا دايما بعمل كوميدي واتبسط إني أغير جلدي وأعمل دور جد'.

وتابع: 'ردود الفعل كويسة وناس مهمة كلمتني أشادت بالدور مبسوط بيه جدا، أنا بتشتم في الرسايل على السوشيال ميديا وبتهدد لو عملت لـ'ميس نادية' حاجة مش هنسكت، الناس صدقوا الشخصية والأحداث، ورابطين اسم 'عصفور' بفكرة 'عصفورة' اللي بيقى موجود في الشغل، دا غير ناس افتكرت أن كان في علاقة بيني وبين 'دعاء' وكانوا بحيبوا بعض، كان في أسئلة كتير ودا خلى الناس تتابع المسلسل'.

وكشف أحمد شاهين في حواره معنا عن أكثر مشهد يحبه في المسلسل وقال: 'في الحلقة التاسعة مشهد بيني وبين سلمى أبو ضيف وهي بتقولي هبلغ عنك، المشهد حسيته أوي لدرجة إني عيطت فيه وأنا بقوله في التصوير وأستاذة نادين جات وحاولت تهديني، قلته مرتين وعيني دمعت لأني كنت حاسس الشخصية أوي واعتقد دا ظاهر في المشهد'.

وأكد أحمد شاهين أن أجواء الكواليس كانت رائعة وقال: 'الشغل مع أستاذة نادين خان جميل، بتحب الممثل وعايزاه يظهر في أحسن صورة وتعليماتها وتوجيهاتها حلوة، أما سلمى أبو ضيف جميلة جدا شاطرة وموهوبة بتمثل بسلاسة'.

وأكمل: 'محالفنيش الحظ إن يجمعني مشهد مع دياب في المسلسل بس بنشتغل مسلسل 'محمود الطيار' بقدم دور 'حسين' صديقه وإن شاء الله يكون مسلسل يليق بالجمهور والناس تحبه'.