أمير عيد في ختام مهرجان العلمين: أنا مش "كيس شيبسي" عشان اهتم إني أبيع أكتر حد .. فيديو

أحيا الفنان أمير عيد مساء أمس الجمعة حفل ختام مهرجان العلمين لموسم صيف 2025، وسط حضور جماهيري كبير، وتحدث على المسرح إلى جمهوره.

دخل أمير عيد في نوبة فضفضة مع جمهوره متحدثا عن قناعاته قائلا: الناس بتتباهى بالفلوس والعربيات والساعات ومعرفش ايه، افتكر أمي مرة قالت لي: عمرك ما هتبقى شخص غني إلا لو عندك حاجة الفلوس مبتشتريهاش.

وأضاف: السوشيال ميديا بتحسسنا إن إحنا مش عايشين، وبنشوف ناس عاملة نفسها مبسوطين وفرحانين، ودي مش ناس حقيقية، انتوا ناس حقيقية، مش محاجين توروا أي حاجة لأي حد.

وأكمل: وأنا جاي في الطريق من القاهرة ناس كتير طلعوا لي التذاكر من العربية وبيسلموا عاليا، كلهم فيهم حماس كبير جدا، الموضوع عمره ما كان بالعدد، الموضوع في الروح اللي هما بيدوهالنا، حتى لو الحضور النهاردة كان نص العد او حتى 10 أشخاص كنت هبقى فخور وهعمل نفس الحفلة بالظبط ... المهم مش كام، المهم في القيمة مش بالكم بالقيمة.

وواصل أمير متحدثا عن رؤيته للفن ودوره قائلا: أنا بعمل الأغاني اللي بحبها مش عشان أكون جامد أو ساعة، أنا مش كيس شيبسي عشان ابقى نفسي أبيع أكتر حد، أنا فنان حر والشغل أفكاري وقناعاتي وبغني لجمهور حر عنده افكار بيحب يفكر.

ووجه الشكر لجمهوره قائلا: شكرا ليكم على ثقتكم وعلى إنكم جمهور ملهم.

اختتم أمير حديثه قائلا: أنا زمان كنت فاكر إن أنا بغني لوحدي في الأوضة ومحدش هيفهم اللي بعلمه، لكن وجودكم غير كل شيء، انتوا السبب النهاردة إني مش بغني لوحدي وإن الأغاني دي بتعيش، وإني مش لوحدي في العالم، العالم اللى بقى دمه تقيل ومش حقيقي.