أشرف زكي: شيرين عبد الوهاب في بيتها بس مش عايزة تخرج

طمأن الفنان أشرف زكي نقيب المهن التمثيلية، جمهور الفنانة شيرين عبد الوهاب عليها، وجاوب على بعض الأسئلة التي طرحها الإعلامي عمرو أديب في برنامجه 'الحكاية'.

وقال أشرف زكي خلال مداخلة هاتفية مع عمرو أديب: 'شيرين عبد الوهاب موجودة في بيتها، وأنا رحت لها وقعدت معاها من 15 يوم، حاولت أقنعها تنزل وتخرج قالت شوية أنا مش حابه أخرج وأنزل دلوقتي، وقالتلي في توقيت ما هتلاقيني بكلمك وبقولك يلا تعالى خدني وننزل، أنا مش في حالة مزاجية إني أنزل دلوقتي، هي كويسة وفي بيتها بس مش عايزة تخرج، بالعافية أنا عرفت أقابلها أنا وبعض أصدقائها'.

وتابع أشرف زكي: 'شيرين معاها ناس وكنت عارف أن بناتها هيروحولها بعد أيام وهي بتعيش حياتها عادي'.

وأكد أشرف زكي أنه ومجموعة من أصدقاء شيرين قرروا أن يتحدوا لمساعدتها قائلا: 'إحنا مجموعة من أصدقاء شيرين اتفقنا نحط إيدينا في إيد بعض لغاية ما نشوف حل للغز اللي إحنا فيه، وشهادة حق قدام ربنا معالي الوزيرة دكتور مايا مرسي وزيرة التضامن الاجتماعي، على تواصل معانا، وفضلت معانا على التليفون حتى الفجر وإحنا بنبحث عن شيرين وقالت إنها موفرة كل الإمكانيات اللي ممكن نحتاجها، وخلال المرحلة القادمة هنقدر نوصل للحفاظ على شيرين عبد الوهاب'.

وكان الإعلامي عمرو أديب وجه رسالة لشيرين عبد الوهاب طالبها فيها بالظهور والتحدث لتطمئن جمهورها عليها.

وقال: ''يا شيرين أنا مابقولكيش اتكلمي معايا أنا مش مستني سبق لكن حرام يا بنتي أنا حاسس أن شيرين بتخلص أنا معرفش هي فين ومين معاها ومرتبطة بمين وصحتها عاملة إزاي ومحدش يعرف حاجة، شيرين دي ثروة مصرية وثروة عربية أنا شايف أن في حالة من حالات الإنكار ناس بتقول سيبوها في حالها طيب هي فين؟'.