هدى المفتي: أغنية "البخت" مش ليا وأنا وويجز أصحاب بس مش مقربين

ردت الفنانة هدى المفتي لأول مرة على سؤال إن كانت أغنية 'البخت' قد غناها ويجز لها.

وأوضحت هدى المفتي أن ويجز لم يغن 'البخت' لها وحكت كواليس ما حدث يوم طرح الأغنية وموقف صعب تعرضت له.

وقالت هدى المفتي: 'الأغنية مش ليا، كان موقف غريب جدا ويضحك، بداية الحكاية أن واحدة صاحبتي من الشلة بتاعة المدرسة القريبين مني ضيعت تليفونها اللي عليه صور وفيديوهات، كانت متوترة أوي وطول الوقت تليفوني ضاع واتسرق وعليه صورنا وإحنا صغيرين وإحنا في البحر، أنا كنت نايمة وعندي تاني يوم تصوير إعلان ولازم أصحى 6 الصبح وأنا نمت من 9'.

تابعت هدى المفتي: 'صاحية من النوم ببص في التليفون لقيت 300 حاجة وستين إشعار ونصهم على تويتر أنا كنت سامعة صوت قلبي ومش راضية افتح وعماله أفكر أنا عملت إيه وبعدين قلت أه تليفون صاحبتي ونزل صورة أو أي حاجة، بعدين قلت مش هفتح تويتر أنا هفتح انستجرام، لقيت رسايل كتير فتحت كان فيه صفحات حقوق المرأة وكاتبين 'لو عايزة نتكلم في الموضوع' قلت في حاجة أكيد أنا ممكن ظهرت مع صحابي في فيديو قلت حاجة ولا لفظ مثلا وإحنا بنهزر، اترعبت'.

وأكملت هدى المفتي حكاياتها: 'الشخص الوحيد اللي كان هيبقى صاحي هي 'حبيبة' من فريق العمل بتاعي اللي كانت جاية معايا تصوير الإعلان كلمتها وسألتها في إيه راحت قالتلي في أغنية نازلة والناس كلها بتقول أنها متغنيالك، سألتها هل هو قال 'هدي' قالت لي لأ قلت طب ليه الناس بتقول إنها ليا أنا، قالتلي اسمعي الأغنية لذيذة مكنتش قادرة اسمع الأغنية من كتر ما أنا خايفة، وبعدين دخلت اتفرج أشوف مكتوب إيه، بس الاغنية مش ليا خالص'.

وعن علاقتها بويجز قالت هدى المفتي: 'مش عارفة ليه الناس نسبوها ليا نفسي أعرف مين طلع الإشاعة دي إحنا كنا بنصور مع بعض مسلسل 'بيمبو' وعلاقتنا كويسة نعرف بعض إحنا معارف ممكن نكون صحاب بس مش مقربين وحوالينا أصدقاء مشتركين كتير ونعرف بعض كويس وأنا بحترمه جدا هو فنان موهوب'.

وطرح ويجز أغنية 'البخت' في فبراير 2022 وتصدرت التريند لأيام بعد ربطها بالفنانة هدى المفتي وأنه يغنيها لها.