محمد سامي يكشف عن خطته المقبلة العالمية.. وهذا ما قاله

أكد المخرج المصري محمد سامي أنه يعمل في الوقت الحالي على عمل سينمائي عالمي وأنه يتمنى أن يحصل على جائزة الأوسكار.

وقال محمد سامي: 'نفسي أعمل فيلم مش تجاري بس بخاف، ونفسي أعمل مسلسلات مش تجارية وبخاف، السينما نفسي أعملها بأشكال كتير نفسي أعمل 20 نوع فيلم ويكون في رصيد سينمائي كبير، في فيلم مش مصري فيلم كونغولي بيتكلم عن بطل من الكونغو نفسي أعمله فيلم عالمي، وفي ناس بتساعدني من برا مصر مضيت معاهم وبنشتغل على الفيلم لكن هو هياخد وقت كبير في التحضيرات ويارب يصدقوا ونعمله. هو فيلم إنساني جدا قصة حقيقية وأخدت حقوقها وكتبت معالجة، ولجأت لكاتب أمريكي مش هقول مين لكن هو حاصل على الأوسكار، بيكتب الفيلم، وفي شركة إنتاج كانوا زاروا الوطن العربي وقعدوا مع قناة كبيرة وشافوا شغلي ورشحوني لمسلسل 6 حلقات مع شركة كبيرة جدا، لكن كان في حد تاني مرشح غيري وهو يستحق أكتر لأنه أنجح عالميا وكانت المقارنة ظالمة، الناس لما عرضت عليهم الفكرة كانوا متحمسين ومتشوقين إننا نشتغل سوا وعجبهم الموضوع. أنا عايز أوصل العالمية بطريقتي وأقدم اللي بحبه ونفسي أخد الأوسكار، ربنا كبير جدا وجميل أنا عمري ما سألت ربنا مثلا أقوله أديني قسط المدرسة بتاع ولادي بقول يارب أديني 10 مليار دولار، ربنا سبحانه وتعالى يملك كل شيء ودايما بطلب منه أكبر حاجة'.

حديث محمد سامي هذا جاء خلال لقاء ببرنامج 'أسرار' من تقديم أميرة بدر عبر قناة 'النهار'.