محمد يحيى: عملت أكتر من 40 أغنية لعمرو ياب ... صوت شيرين عالمي

حل الملحن محمد يحيي ضيفا على برنامج 'لمن يهمه الفن' من تقديم أميرة نور على 'نغم إف إم'.

وكانت أبرز تصريحات محمد يحيى خلال الحلقة:

-عملت نجاحات كتير مع عمرو دياب، أكتر من ٤٠ أغنية وفخور جدا بالتعاون معاه، ده غير إني قريب منه جدا على المستوى الإنساني، وفاهم هو بيحب إيه وعلى قدر الإمكان بحاول أقدم له أحلى ما عندي

-لما بعت لعمرو دياب أغنية 'غيابه فرق' ماردش عليا وما كانش واخد باله منها 3 أيام، وكنت متأكد من نجاحها وفي الآخر شكر في الأغنية جدا

-أغنية 'خليك معايا' كانت دراما وحزن في الأول، ولما عمرو دياب سمعها حبها جدا وبعدها طلب مني أعمل جملة تانية وخلاني أسجلها وأروح لطارق مدكور، ولما إديته الشريط وزعها توزيع جميل جدا وعمرو طلب تتغير لكلمات حب مش دراما، وبعدها وزعها حسن الشافعي

-بحب أركز جدا قبل تقديم شغلي لأي مطرب، ولازم أكون مبسوط جدا وأنا بقدم له ألحاني، وبدور دايما على كلمة أو جملة أو حالة مختلفة

-ماليش طقوس معينة في التلحين، ولما بلاقي كلام بيعجبني بحفظه واللحن بييجي لوحده

-بشتغل بروح الهاوي اللي حابب الشغلانة، مش بروح المحترف عشان شغلي ما يقلبش تجارة

-إليسا من المطربات المقربين ليا على المستوى الإنساني، وهي إنسانة طبيعية وبسيطة جدا وبحب أتعامل معاها

-أغنية 'بشويش علينا يا دنيا' لإليسا عملتها بعد وفاة والدي وصديقي الملحن محمد رحيم، وكنت في مود معين خلاني أطلع الأغنية بالشكل ده

- أغنية 'حلو المكان' بعت لحنها للشاعر أحمد المالكي وكتب كلماتها عليه، وطلعت فكرتها لما اقترحت عليه اسمها، وكنت عايز أغنيها أنا، بس لما خلصت بعتها لتامر حسني وعجبته

- ليا نجاحات كتير أوي مع تامر حسني، وبعزه جدا لأنه جميل ودءوب على شغله وطاقته حلوة

-الشللية كلمة بنرددها كتير مع إن مالهاش حجم بالنسبة لي، وبشوف لو ثنائي نجحوا مع بعض مافيش مانع يشتغلوا سوا برغم إن الملحن بيحتاج يشتغل مع شعراء مختلفين عشان يخرج منه حالات مختلفة

-صوت شيرين عبدالوهاب عالمي، ولما بيتحط على أي لحن بيتحول.

-سيد درويش عبقري جدا وعمل جمل مصرية عبقرية وأثر في محمد عبدالوهاب اللي أخده قدوة ليه، وأصبح راعي التلحين وبعدهم جه جيل بليغ حمدي واتعلموا منهم، وكلنا ننتمي لجيل سيد درويش

-حميد الشاعري عمل طفرة موسيقية في المزيكا

-السوشيال ميديا مملة بالنسبة لي وخلت الناس كلها شبه بعض، وبتاخد من الإنسان أكتر ما بتديله وبتبعد الإنسان عن حياته الطبيعية، والموبايل بقى شريك أساسي للإنسان وبيخليه دايما عايش في توتر

-أنا شخص بسيط ومش بحب أعمل حاجة وأنا متضايق، وبتعصب من البطء اللي بيعطل الإنجاز، وبحب الطموح ومدمن للنجاح، وبحب الناس السالكين اللي شبهي وبعرف أتعامل مع اللي مش سالكين

-لما بشتغل مع مطرب لسه مبتدئ وبيحط حجر الأساس لنفسه بيبقى متعة ليها طعم مختلف

-اشتغلت مع معظم النجوم الكبار واللي ما اتعاونتش معاه لحد الآن فضل شاكر، وأتمنى يكون فيه تعاون قريب

-الفترة الجاية هينزل لإليسا أغاني هتعجبكم، وبدأت حاليا في فترة تحضيرات لعمرو دياب وحماقي وتامر

-بحافظ على شغفي بالتجديد دايما، وبراجع كل شغلي من أول وجديد وأقيمه

-أغنية 'بابا' هي أعلى اغنية عند عمرو دياب كأرقام على اليوتيوب، حوالي ٣٥٠ مليون مشاهدة، وبالنسبة لي لما بشوفها بحاول أعلي السقف بتاعي أكتر

-صناعة الفن عموما محتاجة ترتقي بسبب الذوق العام، لأنه أصبح سئ جدا ومحتاجين جهات رقابية بجد على الكلمات اللي بنسمعها