خاص غادة طلعت لـ"في الفن": "ابتسام" في "قهوة المحطة" شخصية مش سهلة واتشمت من الأمهات بسبب "قلبي ومفتاحه"

عام مختلف للفنانة غادة طلعت بمشاركتها في عدد من المسلسلات الناجحة وتعد من أهم أعمال موسم رمضان 2025.

بأداء سلس سواء كبر الدور أو صغر قدمت غادة طلعت شخصيات مختلفة لتعتبر أن 2025 هو عام سعدها.

تواصل FilFan.com مع غادة طلعت لتحدثنا عن الأعمال التي شاركت فيها هذا العام.

شاركتي في رمضان 2025 في أكتر من مسلسل، كلمينا عن التجربة؟

مبسوطة أوي بتوفيق ربنا أنه ساعدني اختار حاجات الحمد لله طلعت موفقة جدا من أول 'ولاد الشمس' أول ما قريته كنت شايفة أن المسلسل دا هينجح والحمد لله رؤيتي ليه كانت صح لأن قضيته مهمة، و'قلبي ومفتاحه' أنا اختيار المخرج تامر محسن وطبعا سعيدة بالاختيار دا فرحانة بنجاح المسلسل، و'فهد البطل' مع أحمد العوضي ممثل جميل وناجح ومجتهد.

وتابعت 'المداح' السنة دي تجربة حلوة ومختلفة أنا متابعة نجاحه طول الوقت وكنت أحب اشتغل فيه وشايفة توفيق ربنا لحمادة هلال ونجاح 5 أجزاء وسعيدة إني اتعرفت على المخرج أحمد سمير فرج هو مخرج مختلف وبسيط وبيحب الممثل ويهتم بالتفاصيل كسبت إني اشتغلت معاه'، و'جودر' أنا بحبه من السنة اللي فاتت، أما 'قهوة المحطة' هو التعاون التالت مع المخرج إسلام خيري بعد 'جت سليمة' و'جودر'.

لفتت شخصية 'ابتسام' في قهوة المحطة أنظار الجمهور، حضرتي ليها إزاي؟

'ابتسام' شخصية مش سهلة، شكلها يبان سهل لكن أستاذ عبد الرحيم كمال كاتب شخصيات صعبة، مش شخصية واضحة مش شريرة ومش طيبة هي شكلها حاجة وجواها حاجة تانية، اللوك كان أستاذ إسلام خيري اختاره وعجبه المكياج اللي أنا كنت عملاه كان إحساسي أن الست دي يبقى مكياجها كده، أستاذ إسلام خيري عمل مجهود كبير أنه يطلع الشخصيات زي ما هو متخيلها وزي ما استاذ عبد الرحيم كمال كاتبها.

إيه أصعب مشهد ليكي في 'قهوة المحطة'؟

مشهد التحقيق دا كان صعب جدا لأنها طول الوقت بتنكر والمفروض تفضل متماسكة بعدين نشوف خناقتها مع مؤمن ونتعرف على شخصيتها وبعدها نشوف انهيارها.

وأكملت: 'ابتسام' صعوبتها أنها أكبر مني سنا كان لازم تظهر أكبر من شخصيتي الحقيقة وكان لازم يبان في تفاصيل كتير، أنا محظوظة اني اشتغلت بكتابة عبد الرحيم كمال لأن أي ممثل يحب يشتغل معاه هو كاتب مهم وأعماله عظيمة وبحبها جدا.

تتر مسلسل 'قهوة المحطة' هو أغنية لأحمد منيب والجمهور اتكلم عنه، رأيك إيه في الاختيار دا؟

التتر دا أكتر حاجة أشعرتني لما سمعته وكنت مبسوطة ومبهورة بيها، لأني كنت مشيرة صورة البوستر بتاعي من المسلسل قبلها بأسابيع على أغنية لأحمد منيب لأني بعشقه.

كلمينا على ردود الفعل اللي جاتلك على المسلسلات اللي شاركتي فيها؟

مبسوطة بردود الأفعال على دوري في 'قهوة المحطة'، في ناس اتكلمت على نظرات عين 'ابتسام' وأشادوا بالأداء وأن نظارتها بتخوف ردود الأفعال كبيرة بالنسبة ليا والسنة دي من أكتر السنين اللي مبسوطة فيها.

قدمتي أكتر من شخصية في رمضان 2025، إيه أكتر شخصية تحمستي ليها؟

أكتر شخصية كنت متحمسة لها كانت 'ابتسام' في 'قهوة المحطة' لأني برتاح في الشغل مع أستاذ إسلام خيري فكان نفسي اشتغل معاه في مسلسله الجديد وكتابة عبد الرحيم كمال ودي مسئولية وثقة من أستاذ إسلام. بس كل الشخصيات اللي قدمتها السنة دي مبسوطة بيها لأني عملتها بحب وإحساس، شخصية 'حنان' في 'قلبي ومفتاحة' مبسوطة ومكنتش مصدقة أن المشهد اتشاف وعليه ردود أفعال ناس بتشكر في 'حنان' وناس تشتمها عشان مشهد أم العريس اللي بتهزأ في العروسة، البنات وقفت مع 'حنان' والأمهات كانت ضدها، المشهد البسيط فهمت أهميته وفهمت وجهة نظر أستاذ تامر محسن لما كان بيقولي عليه، أنا اتشتمت شتايم من الأمهات في عقليات وطبقية بتكفر بطريقة مختلفة.

احكيلنا عن كواليسك مع النجوم في المسلسلات اللي شاركتي فيها؟

آسر ياسين لطيف ومحترف ومركز في التفاصيل ومريح في الشغل، ومبسوطة بالشغل مع أحمد مالك في 'ولاد الشمس' ومبسوطة بنجاحه لأني كنت شايفة قد إيه تعب وأنه مركز في التفاصيل وبيشتغل على نفسه وبيساعد كل اللي حواليه وفاهم في كل حاجة هو ممثل كبير ويستحق النجومية ممثل محترف، وفرح يوسف كانت تجنن وتستحق النجاح.

أستاذ رياض الخولي دي تالت تجربة معاه اشتغلت معاه 'الفتوة' واشتغلت معاه 'آخر دور'، ممثل كبير ونجم ومحظوظة إني بشتغل معاه خبرة وطول الوقت لطيف وبيحكيلي على ذكرياته وتجارب مر بيها مبسوطة بالشغل معاه وأتمنى دايما أمثل مع ممثلين كبار زيه.

قبل شهر رمضان شاركتي في مسرحية 'ألف تيتة وتيتة' مع أكرم حسني، كلمينا عن التجربة دي؟

انبسطت بتجربة أكرم حسني ومسرحية 'ألف تيتة وتيتة' دي تاني مرة اشتغلت معاه قبل كده مسرحية 'تطبق الشروط والأحكام' هو ممثل كبير ودمه خفيف جدا وفي نفس الوقت جاد ومنضبط ومهتم بكل التفاصيل والنجومية اللي جاتله مش بالصدفة، وبنستعد تبدأ بروفات تاني عشان نعرض 'ألف تيتة وتيتة' في جدة قريب أوي.