فيديو - مريم نعوم: فكرة "لام شمسية" بدأت قبل 5 سنوات بمشروع بطلته تعرضت للتحرش في طفولتها

كشفت الكاتبة والسيناريست مريم نعوم كواليس وأسرار إقدامها على كتابة مسلسل 'لام شمسية'، مؤكدة أن القضية التي يناقشها العمل 'واقعية جدًا وموجودة في المجتمع'.

وقالت مريم نعوم خلال حوارها مع الإعلامية لميس الحديدي في برنامج 'كلمة أخيرة' المذاع عبر قناة on: 'طول الوقت يشغلني موضوعات من قلب المجتمع، لكن كل حاجة بييجي وقتها وبتخرج للنور في التوقيت المناسب'.

أوضحت مريم نعوم أن فكرة المسلسل بدأت قبل حوالي خمس سنوات قائلة: 'وقتها حسيت إني مستعدة أتكلم عن القضية. ساعات ببقى محتاجة أكون على المستوى الشخصي ناضجة كفاية علشان أقدر أكتب عن حاجة زي دي، وأشوفها بمنظور أوسع'.

وأضافت: 'كنت بشتغل وقتها على مشروع تاني بطلته كانت ضحية تحرش في طفولتها، ولما تعمقت في الأحداث لقيت إن كتير من تصرفاتها في الكبر راجعة للحظة حصلت في الطفولة، وقتها قلت لازم أشتغل على عمل يخص القضية دي من جذورها، ومن هنا بدأت فكرة (لام شمسية)'.

وتابعت: 'أي حد بيعاني من اضطرابات نفسية، غالبًا الجذور بترجع لطفولته، فما بالك لو الطفولة دي كان فيها انتهاكات جسدية أو جنسية؟ عشان كده حسيت إني لازم أبدأ الرحلة دي'.

تحدثت مريم نعوم عن تواصلها مع سارة عزيز، المتخصصة في قضايا التحرش بالأطفال، قائلة: 'قلت لها عندي مشروع وعايزة مساعدتك. وبدأنا نذاكر كل تفصيلة، مفيش مشهد بيتكتب أو بيتصور من غير ما أرجع فيه للخبير المناسب له، سواء في الطب النفسي أو القانون، وحتى ليلة تصوير المشهد'.

وبخصوص اسم المسلسل، أوضحت أن صاحبة الفكرة هي سمر عبد الناصر، إحدى الكاتبات في ورشة سرد، مضيفة: 'الحقيقة إن مشروع لام شمسية مر على أكتر من كاتب ثلاث مرات، وسمر كانت أحد أعضاء الفريق وهي اللي اقترحت الاسم، وفعلاً حسينا إنه اسم مثالي ومعبّر واتفقنا عليه'.

قصة مسلسل 'لام شمسية'

تدور أحداث مسلسل 'لام شمسية' في إطار اجتماعي، ويطرح العمل عددا من القضايا، ومنها علاقات الأزواج والتعدي على الأطفال.

أبطال مسلسل 'لام شمسية'

مسلسل 'لام شمسية' من تأليف مريم نعوم وورشة سرد، وإخراج كريم الشناوى، وإنتاج شركة ميديا هب – سعدي وجوهر، وبطولة أمينة خليل، أحمد السعدنى، محمد شاهين، يسرا اللوزى، ثراء جبيل، صفاء الطوخى ياسمينا العبد والطفل علي البيلي وعدد آخر من الفنانين.