خاص خالد الكمار لـ"في الفن": موسيقى الأفلام الغنائية الأقرب لقلبي وحلم حياتي أقدم أغاني للأطفال وعبد الوهاب "أيدول" الموسيقى

يشارك الموسيقار خالد الكمار في الدورة الرابعة من مهرجان البحر الأحمر السينمائي بالجزء الثاني من الفيلم الاستعراضي الغنائي 'سكر'.

والتقى FilFan.com بـ خالد الكمار ليحدثنا عن تجربته مع الفيلم والصعوبات التي مر بها.

حدثنا عن تقديم فيلم موسيقي مصري عربي

في فترة ما من تاريخنا كانت أنجح الأفلام افلام موسيقية، أفلام فريد الأطرش وعبد الحليم حافظ هي موسيقية، لكن من بعد فيلم 'خلي بالك من زوزو' اختفى الموضوع ومبقاش في أفلام غنائية، بالنسبة ليا أن النوعية دي من الأفلام هي الأقرب لقلبي، لما عرفت بفيلم 'سكر' حسيت أنها فرصة أخيرا نقدمه.

أكتر فيلم مصري تشعر أنه بالفعل فيلم استعراضي موسيقي وليس فقط فيلم به مجموعة من الأغاني؟

فيلم 'خلي بالك من زوزو' موسيقى إذا شيلنا الأغاني منه هيختل، هو دا النموذج، وفيلم 'بنات اليوم' لعبد الحليم حافظ هي مش مجرد أغاني جميلة في الفيلم هي جزء من القصة.

موسيقيا كيف يتم التعامل مع الأفلام الموجهة للأطفال؟

حاجة مؤسفة أن مفيش أفلام كتير بتتعمل للأطفال، كان عندنا تجارب للأطفال في وقت الموسيقار عمار الشريعي لكن فجأة اختفت تماما، ممكن نقول الموجة الأمريكاني طغت علينا، والأطفال حاليا مش مهتمين غير بأغاني ديزني، بالنسبة ليا حلم حياتي الأكبر أني أقدم أغاني للأطفال.

ما الصعوبات التي واجهتها خلال التحضير لفيلم 'سكر'؟

أصعب حاجة كانت في الجزء التاني أن فجأة الموضوع يتقلب جد، الجزء الأول كان حالم جدا، لكن الموسيقى في الجزء التاني من 'سكر' خدت جانب أوركسترالي.

هل ترى الموسيقى الأوركسترالية في الفيلم قد لا يفهمها الأطفال؟

هدفنا إننا نقدم حاجة لما الأطفال يتفرجوا عليها ميحسوش أنها حاجة مختلفة كتير عن اللي متعودين عليه برا ولكن في نفس الوقت حاجة بتاعتنا وعربية وشرقية جدا.

ما رأيك في فكرة تقديم حفلات للموسيقى التصويرية؟

الفضل يرجع في الموضوع دا للموسيقار عمر خيرت أنه حول الموسيقى التصويرية لحفلات في بداية التسعينيات، ومؤخرا هشام نزيه قدم أول حفل ليه في الجونة، وأنا بدأت أخد الخطوات وعملت حفل في مكتبة الإسكندرية.

في رأيك من هو 'أيدول' الموسيقى عربيا وعالميا؟

عربيا محمد عبد الوهاب، عالميا فرانز شوبرت.

هل ترى أن الموسيقى التصويرية أخذت حقها من الاهتمام في المهرجانات؟

هو في تطور، لكن لسه معظم المهرجانات مبتديش جايزة للموسيقى التصويرية، منهم مهرجان القاهرة ودي حاجة حزينة.

ما جديدك الفترة المقبلة؟

مسلسل 'ساعته وتاريخه' بدأ عرضه على dmc وحاليا شغال على فيلم 'بنات الباشا' ومسلسل 'كارثة طبيعية' لمحمد سلام.