بالصورة - زوج علا غانم يرد على إتهاماتها: "علا لا تقصد ما تقوله وأتمنى تحاول وتدخل مستشفى"

بعد تصريحات الممثلة المصرية علا غانم حول تعرضها للإعتداء من قبل زوجها رجل الأعمال عبدالعزيز حسن، وبعد أن قالت إنه طردها من المنزل، تداول مواقع التواصل الإجتماعي فيديو لزوجها وهو ينفي كل ما قالته علا، وأكد أنهما متزوجان منذ 18 عاماً وحياتهما كانت سعيدة.

تعيش علا وعائلتها في الولايات المتحدة، وقالت لزوجها إنها تريد زيارة مصر لمدة شهر، بحسب ما قال زوجها، وأضاف: 'فوجئت في يوم 2 أو 3 أكتوبر المستشار القانوني بتاعي في مصر بيقولي مدام علا رافعة قضية خلع، قلتله احنا اتصالحنا من 3 سنين قالي لأ دي واحدة تانية من اكتر من سنة استغربت وقلت دي عايشة معايا، المحامي راح للقاضي والقضية اترفضت دي اول مرة، القضية كانت راحت على عنوان المعادي وانا مش ساكن في المعادي، أنا في أمريكا وليا سكن في سقارة'.

وتابع: 'رفعوا قضية مرة تانية حطوا عنوان والدتي بوسط البلد، وانا مش في العنوان ده وكان هيتم نظر القضية وقبلها طلب مني المحامي اجي على مصر، رحت قابلت شيخ الأزهر وقلتله إني مش عايز أسيب علا، وعارف ان والدتها هي اللي ورا المشاكل، والدتها بتكرهني من أول ما اتجوزنا، هي شخص قوي جدا، وخلت بنت علا تكرهني واخو علا وسببت مشاكل كتير جدا'.

وأكمل في الفيديو وهو مستلقي على أريكة توضح الإصابات في وجهه ويده وقال: 'جيت داخل البيت لقيت علا حاطة بلطجية على الباب علا ضربتني بإزازة نبيذ في عيني والولد راح شايلني حدفني على الباب واتكسر، وراحت أمها ضربتني بحديدة على دراعي، جه البوليس اخدونا ورحنا انا وهي وامها والاتنين اللي هما الغفرا بتوعها، الولد الغفير بجلابية ضرب دماغه في الحيطة، ونبهت أمين الشرطة، اخدوا أقوالنا ورحنا النيابة قعدنا لستة صباحا، كان كل حاجة كويسة لحد ما مدير النيابة قالنا انتوا مروحين'.

وأنهى: 'فوجئت انها بعد كده بتقول إن فيه حد هجم على البيت رئيس النيابة كان هنا امبارح واخد بطايق الناس اللي أنا معينهم، وكشف عليهم ملقاش حد مسجل زي اللي كانت جايباهم، مرة تانية بقول لعلا أهلا وسهلا في بيتك احنا لسه متجوزين مفيش أي مشكلة بيني وبينك وعمري ما هعمل حاجة تضايق أي مخلوق، بالعكس أنا زعلان على اللي هي عملته فيا، لو أنا عملت حاجة غلط القانون ياخد مجراه، البيت ده بيت الزوجية ومعايا عقد، أنا واثق إن القانون المصري قوي ويعرف الحق، بعتذر لكل الناس بالنيابة عن علا لإني عارف إنها متقصدش اللي هي قالته، علا حد جميل وطيب في أوقات لا تقصد ما تقوله، وأتمنى تحاول وتدخل مستشفى'.