حسين فهمي: سعاد حسني لم تنتحر وهذه أدلتي

تحدث النجم حسين فهمي عن الراحلة سعاد حسني مشككا في كل التحقيقات التي أكدت انتحارها.

قال حسين فهمي: 'سعاد حسني مانتحرتش، مش متأكد أنها قُتلت، بس كان عندها إمكانية إنها تنتحر بطريقة أحسن من كدة، بتاخد أدوية مهدئة، ولو زودت الكمية هنتنحر، تاخد حبوب وتنام في السرير وخلاص، ليه تقص السلك وترمي نفسها، وسألت ناس ودكاترة، الإنسان اللي بيرمي نفسه مايقدرش يبعد أكتر من متر ونص، هي كانت على بعد 5 كيلو، واللي بيرمي نفسه بيبقى في دم، دي مكنش في دم حواليها! يعني الجثة كانت أصلا متوفية'، حسب تصريحاته في برنامج 'العرافة' الذي تقدمه بسمة وهبة عبر قناتي 'القاهرة والناس'.

وأضاف حسين فهمي: سعاد حسني مكنش عندها أزمة مادية، كان عندها فلوس في البنك آلاف الاسترليني وسحبتهم واختفوا! هي كانت راجعة مصر خلاص، أنا اعرف سعاد كويس أوي وسافرت معها وعشت معها برا.

وعن تفاصيل علاقتهما قبل الوفاة، قال حسين فهمي: 'أنا كرمتها في مهرجان السينما، وقولت لها تيجي وقالت لي لا مش هقدر أجي، ومكنتش عايزة الناس تشوفها، شكلها مكنش سعاد حسني اللي إحنا عارفينها، وقولت لها طب سجلي لي كلمة أذيعها في المهرجان، وسجلت حوالي 10 دقائق، وكانوا كتير اوي على المسرح فاخترت منهم 3 دقائق في افتتاح المهرجان ودا كتير، بس دايما الناس بتتكلم، وكانت بتشكر الناس والمهرجان على التكريم، وكلمتني بليل عن رأي الناس، وقالت لي شوف لنا حاجة نعملها مع بعض وشوف لنا سيناريو حلو، وقولت لها طيب يا سعاد، ودا قبل الوفاة بـ3 أيام، معنوياتها كانت مرتفعة'.

واستكمل حسين فهمي: سمير صبري عمل حلقات عن الموضوع دا، سعاد حسني كانت حقائبها جاهزة، وهي مكنش ليها أعداء، وعمر ما كان ليها أعداء، من الممكن ان يكون شخص داخل يعمل جريمة سرقة مثلا ولقها، وأنا بقول اللي عمل كدة مايعرفهاش، ممكن يبقى أجير أو داخل يسرق،

يذكر أن سعاد حسني توفيت في 1 يونيو 2001 في حادث شهير في انجلترا مازال لغزا حتى الآن.