منى زكي: بتكلم مع ربنا واشتكي له عشان أخرج طاقة الغضب من جوايا (فيديو)

كشفت الفنانة منى زكي طريقتها في التخلص من مشاعر الغضب والضيق عن طريق التأمل والقرب من الله.

وقالت منى زكي في لقائها مع الإعلامي محمود سعد ببرنامج SoldOut ويعرض عبر منصة WatchIt: 'ناس كتير متعلموش إزاي لما يكون عندهم مشاعر أنهم يعبروا عنها ويخرجوها سواء هي غضب أو حب جزء من الغضب دا لما بتفضل شايله بيبقى مش صح، أنا بطلع غضبي في نفسي بيجيلي وقت بعيط أنا عموما بحب أخد حقي ولما معرفش أخد حقي بيبقى عندي غضب عام، بعمل تأمل وبقرب من ربنا، مش الحاجات العادية اللي بنعملها كل يوم بقرب أكتر وقتها بحس أن لازم اتكلم مع ربنا وبفضل أقول أنا عملت كذا وكذا ليه دا يحصلي؟ وأقوله يرضيك أنا عارفة أن دا ميرضكش لأن عارف جوايا إيه'.

وتابعت منى زكي: 'بقعد حقيقي يحصل حوار كبير وبينتهي بعياط وفرج، بحس أن عندي غضب لكن أنا ارتحت من جوايا، من لحظة الفضفضة وأن ربنا سمعني وحصل حوار وأكيد متسجل بينا ومش هيسيبني، والحوار دا محدش بيسمعه بكون مع نفسي أو في العربية.

وعن التأمل قالت منى زكي أنها تعلمت واحد من أصعب أنواع التأمل ثم بعدها تعلمت أنواع أبسط، والآن هي تمكنت من الوصول إلى التأمل لمدة نصف ساعة تنعزل فيها دون أي تفكير، وهو ما يساعدها في التركيز بعد ذلك وكأنها نامت وارتاحت لفترة.

وخلال اللقاء كشفت منى زكي سر نجاح واستمرار زواجها من الفنان أحمد حلمي لمدة 21 عاما.

وقالت منى زكي: 'انجذبت لأحمد حلمي لأنه كان بيضحكني، وهو هديتي من ربنا، وعلّمني معنى التسامح، ودايمًا بيتفهم ظروف شغلي، وبيحب نجاحي'.

وأضافت: 'علاقتنا مستمرة لأننا مبنشوفش بعض كتير، لكن الحقيقة أحمد شخص متفهم، وبيشجعني أكون أحسن عشان كده بعشقه.

وأوضحت منى زكي، أنها تستعين بزوجها أحمد حلمي، في الأدوار اللايت كوميدي التي تعرض عليها، حيث أكدت أنها تثق في رأيه واختياراته الفنية في القالب الكوميدي.

يذكر أن منى زكي عرض لها في رمضان 2023 مسلسل 'تحت الوصاية' وشارك في بطولته دياب، نسرين أمين، نهى عابدين، مها نصار، رشدي الشامي، أحمد خالد صالح، علي الطيب، محمد عبد العظيم، خالد كمال، ثراء جبيل، الطفل عمر شريف، من تأليف شيرين دياب وخالد دياب إخراج محمد شاكر خضير، إنتاج سعدي جوهر.

حمل آبلكيشن FilFan ... و(عيش وسط النجوم)