أحمد ماهر: مش من حق الممثلة ترفض التلامس

كشف الفنان أحمد ماهر عن رأيه في مصطلح السينما النظيفة ورفض بعض الفنانات لفكرة التلامس في الأعمال الفنية.

وقال أحمد ماهر خلال لقائه في برنامج 'أوضة ضلمة':أنا ضد مصطلح السينما النظيفة، أنا اتربيت تربية أكاديمية وخرجت للحياة الفنية وحتى وأنا طالب أساتذتنا خلونا نقف وسط كبار النجوم فتعلمنا منهم ما لم نتعلمه داخل الأكاديمية، أهم ما تعلمناه أن الفن رسالة وخطاب وكلمة بعيدا عن هذا المعنى ميبقاش فن، يعني حتى التهريج لابد أن يخضع لقواعد حتى نطلق عليه فن، الارتجال له مدرسة لكن مسألة العشوائية وأن كل واحد يقول أي حاجة تعرض لخياله الفن عملية منظمة متكاملة ومترابطة ومتفق عليها مينفعش أخرج عن الإطار الذي تم الاتفاق عليه لا يشعر الزمل اللي معايا إنه خنته'.

وعن رفض بعض الفنانات للتلامس قال أحمد ماهر: 'مش من حق الممثلة إنها ترفض التلامس اللي ارتضى بهذه المهنة ليس هناك من محاذير زي ما بيقولوا لا حياء في الدين ولا حياء في الفن إزاي المشاهد يستشعر إن الأستاذة دي طالعة بشخصية الزوجة أو بشخصية العشيقة أو بشخصية بنت الليل إزاي لازم تقدم كل شيء'.

وخلال اللقاء حكى أحمد ماهر عن موقف جمعه بالفنان عادل إمام في كواليس فيلم 'شمس الزناتي' تسبب في غضب الزعيم منه.

وحكى 'أنا وقت تصوير فيلم 'شمس الزناتي' كنت بصور مسلسل 'ذئاب الجبل' ومعايا أوردر 'شمس الزناتي' أول يوم تصوير في استديو مصر الساعة واحدة، كنت بصور 'ذئاب الجبل' في ماسبيرو والمفروض أعمل مشهد وأمشي، المشهد يبدأ 10 بالكتير هخلص 11 أو 11 ونص وعربيتي قصاد ماسبيرو هركب وأروح لهناك'.

وتابع أحمد ماهر: 'جيت خارج لقيت الباب مقفول وعليه قفل وقالولي معلش في ديكور مهم نصوره وإلا هنتحمل يوم تاني إنتاجيا، طيب أنا عندي أوردر في استديو مصر سألوا مع مين، واتصلوا بإدارة الإنتاج واتفقوا معاهم، وقعدت كملت تصوير بناء على هذا الاتفاق'.

وأكمل أحمد ماهر: 'صورت وخلصت الساعة 2 ركبت عربيتي وروحت، طبعا الموقف سيء وهما فضلوا قاعدين مستنين أول ما دخلت اعتذرت وأن المسألة خارجة عن إرادتي وإن الإنتاج في ماسبيرو كلم الإنتاج في استديو مصر والكل على علم، دخلت أعمل المكياج حد جيه وقالي أن أستاذ عادل إمام زعلان عشان الموقف دا، قلت له إني اعتذرت بالرغم أن الموضوع خارج عني والإنتاج والمخرج تم تبليغهم وأنا اعتذرت للكل، قالي لأ كان عايزك تعتذر له هو لوحده، لكن أنا رفضت اعتذر له لوحده فغضب عادل إمام'.