يسرا اللوزي عن "لام شمسية": عايزة اتخلص من طاقة "رباب" السلبية

تحدثت الفنانة يسرا اللوزي عن تأثير شخصية 'رباب' التي تقدمها في مسلسل 'لام شمسية' عليها.

وقالت يسرا اللوزي في لقاء مع ET بالعربي: 'مش هفتي وأقول رباب بتروح معايا البيت بس في تقل بحس أني ببص لنفسي في المراية بلاقي نظرة عيني مش نظرة عيني، روحي فيها حاجة ناقصة، محتاجة أنا وقت أعمل حاجات تسعدني أحط مكياج وألبس لبس حلو وعايزة أقص شعري عايزة اتخلص من طاقة رباب السلبية'.

وتابعت يسرا اللوزي: 'بتخض لما بشوف نفسي في المسلسل قبل التصوير وأنا قاعدة ومش حاطة مكياج ببص لنفسي وبقول عادي شكلي مقبول، لما بشوف المشهد بقول هو أنا شكلي كده وشكلي مختلف'.

وعن رد فعل الجمهور على الشخصية ومطالبتها بعدم الصمت وكشف حقيقة زوجها قالت يسرا اللوزي: 'رباب في حالة وحشة في منطقة غامقة جدا السبب الأساسي انها متتكلمش عشان بنتها ساكته ومستحملة عشان خايفة على بنتها أهم حاجة أنها متعرفش ومتحسش ودا مش بالضرورة صح لأنها بتضر بنتها بطرق تانية لأن البنت مش فاهماها وحاسه أنها أم مقصرة'.

ووجهت يسرا اللوزي نصيحة للنساء اللاتي قد يقعن في دوامة الاكتئاب قائلة: 'أقول لأي واحدة بتعاني من الاكتئاب تحاول تهتم بنفسها وتدرك أن هي في أزمة أول خطوه أن الواحد يبقى واخد باله أن عنده مشكلة، اللي عنده اكتئاب بيبقى داخل في حفرة ضلمة أوي فأتمنى الناس اللي في الحالة دي يبقى عندهم ناس حواليهم بيحبوهم ويخافوا عليهم يقدروا يوجهوهم ويقولهم أن عندهم مشكلة ويساعدوهم ويحطوهم في بداية المشوار الصح'.

ومسلسل 'لام شمسية' من تأليف مريم نعوم وورشة سرد، وإخراج كريم الشناوى، وإنتاج شركة ميديا هب – سعدي وجوهر، وبطولة أمينة خليل، أحمد السعدنى، محمد شاهين، يسرا اللوزى، ثراء جبيل، صفاء الطوخى ياسمينا العبد والطفل علي البيلي وعدد آخر من الفنانين.