بهاء الدين محمد عن قلة تعاونه مع المطربات: نجاح "اكتبلك تعهد" السبب

حكى الشاعر بهاء الدين محمد سبب ابتعاده عن الساحة الغنائية وقلة تعاونه مع المطربات موضحا أن كل هذا يرجع إلى نجاح أغنية 'اكتبلك تعهد' لأنغام.

وكتب بهاء الدين محمد عبر حسابه على Facebook: 'كتير بيسألونى إنت ليه مابقيتش تنزل مع مطربات ؟ ومضطر أحكيلكم اللى حصل بعد كارثة نجاح اكتبلك تعهد اللى دفعت تمن نجاحها بكل الطرق !!!'.

وتابع: 'مطربة نجمة اتصلت تباركلى أيامها على النجاح وشكرتها وفوجئت تانى يوم إنها لغت الإستوديو لأغنية مهمة !! ومطربة نجمة اتصلت بيا ومش عاجباها اكتبلك تعهد وعاملتها بكل ذوق احتراما لغيرتها وبرضه لغت أغانيها معايا !!! ومطربة نجمة كنا بنحضر 6 أغاني وفجأة لغت كل أغانيا، ومطربة نجمة كانت عايزة 'اكتبلك تعهد' راب ولأني اعترضت على اللحن لأني عارف الشكل اللي لازم يحاوط كلماتي واتضايقت ولغت باقي شغلي ومانزلش، والمطربة اللى قالت لملحن بهاء الدين محمد بيحب أنغام أكتر مني

واللي واللي واللي ...!!!'.

وأضاف بهاء الدين محمد: 'وهي دي المواقف اللي اتعرضتلها وتم عزلي رغم إن نجاح الأغنية المفروض يكون خير على كل صناع الأغنية ولكن لأن فكرتها مهمة اتاخد مني مواقف كتير، وكأنه عقاب ودفعت التمن لوحدي'.

واختتم بهاء الدين محمد كلامه: 'هي دي الحكاية باختصار جدا بس أنا محترف ومتعود على كده بعد كل نجاح زيادة !! بس أوعدكم بكام أغنية لكام مطربة مش منهم الفترة الجاية إن شاءا لله وأعوضكم كل فترة الصمت اللى ماكانتش بإيدي'.

وأغنية 'أكتبلك تعهد' كلمات بهاء الدين محمد وألحان إيهاب عبد الواحد وتوزيع مادي، وطرحتها أنغام ضمن ألبومها 'أحلام بريئة' عام 2015.