رانيا محمود ياسين توضح أسباب عدم عملها مع والدها وزوجها محمد رياض

رانيا محمود ياسين

خلال لقائها في برنامج الستات ما يعرفوش يكدبوا' الذي تقدمه الإعلاميتان إيمان عز الدين وهبة الأباصيري، كشفت الفنانة رانيا محمود ياسين، عن الصفات المشتركة بين والدها الراحل وزوجها الفنان محمد رياض، إلى جانب حديثها عن سبب رفض والدها مشاركتها في مسلسل العصيان، وعدم عملها مع زوجها.

وقالت رانيا: 'الاتنين طيبين أوي وبزيادة ومثاليين والاتنين عندهم عدل، لكن الدنيا مش عاوزة المثالية الزيادة دي، والاتنين كانوا بيخجلوا ييجبوني في أعمال معاهم، فمثلا محمد كان يخجل إنه يرشحني ونفس الشيء أبويا معايا ومع أمي'.

وتابعت: 'لما اشتركت في مسلسل العصيان الناس كانت فاكرة إن والدي اللي رشحني، ولكن العكس والدي كان رافض والراحل أحمد السبعاوي كلمني من ورا والدي ورشحني ووالدي ما كانش موافق وقال لي دور هيلزق فيكي العمر كله وهيفتكروكي شريرة، وفعلا قعد في شخصية ناهد سنين والناس يفتكروني إني ناهد الغرباوي ويكلموني على أساس إني ناهد الغرباوي الشريرة، والناس كرهتني وكنت بصبر نفسي بأني أكيد نجحت فيها علشان كده الناس صدقتها، وللأسف ما كنتش مصدقة والدي وكنت شايفة أنه مانعني من حاجة عاجباني وعملت الدور وبعتوا لي الورق من وراه'.

وتحدثت عن الصفات التي تعلمتها من أسرتها وزوجها الفنان محمد رياض، مشيرة إلى أنها متزوجة منذ 25 سنة، وتعلمت الكثير من الأمور من زوجها وأصبحت أهدأ كثيرًا عن السابق.

وقالت: 'أنا ومحمد رياض داخلين على 25 سنة متجوزين، وعشت معاه أكتر ما عشت مع أهلي لأني اتجوزته صغيرة.. واتعلمت منه إني ما أكشفش كل ورقي بسهولة، لأن هو بيحب يسمع أنا بحب اتكلم، واتعلمت منه إني اسمع وفي الآخر أبني قرار، وإني أهدى في مشاعري ومبينش كل مشاعري مرة واحدة، خاصة إن هو عنده تريث وهدوء وبيدرس الأمور، لكن أنا دايمًا مندفعة ومش بحب أضيع وقت في دراسة الأمور، وعندي روح المخاطرة.. هو ظبط لي الحتة دي إلى حد ما، وبقيت بحاول أخلي كل شيء بالهداوة'.

وعن الصفات التي اكتسبتها من أسرتها ووالديها الفنان الراحل محمود ياسين ووالدتها الفنانة شهيرة، قالت: 'الحاجات اللي اكتسبتها من أهلي كتير زي حب البيت والأسرة واتوصيت على ده بطريقة مباشرة وغير مباشرة، وطول الوقت معايا وشفت منهم حرصهم على البيت، وقالوا لي لازم تحافظي على بيتك وتخلي بالك.. وإحنا كنا جيل مؤدب وأهلنا لما بيقولوا حاجة يبقى هي دي الصح، عكس الجيل الحالي'.

وأضافت: 'خدت من أمي الخوف الزيادة علينا ومن بابا صفة اتقي شر الحليم إذا غضب، لأن والدي لما كان يتنرفز ما يتعرفش لأنه عنده حلم شديد وصبر على اللي قدامه وشخص لطيف ومتواضع بس ما تزعلهوش كتير لأنه بيكون صبر وبيدي فرص كتير، وأنا مش بنفعل بسرعة وبدي فرص كتير بس لما بقلب بكون وحشة أوي'.

وعن الشخصيات الأقرب لها في الأعمال التي قدمتها، أشارت إلى أن شخصيتها في مسلسل 'فلانتينو' بطولة الزعيم عادل إمام تشبهها بدرجة كبيرة، كاشفة في الوقت نفسه كواليس مشاركتها في العمل.

وقالت رانيا محمود ياسين: 'كل شخصية عملتها فيها حتة مني، ولكن فلانتينو الأقرب لي، ووقتها كنت في حيرة بين إني أكمل عرض مسرحي على المسرح القومي عملت فيه مجهود شديد واشتغلت على الشخصية جامد، أو إني أوافق على المشاركة في فلانتينو، وكان لازم أختار أشتغل مع عادل إمام أو أخليني في العرض وأضيع مني عمل مهم مع عادل إمام'.

وأضافت: 'كنت متنكدة لأني تعبت بشكل كبير في المسرحية دي، ولما قرأت دوري في مسلسل فلانتينو لقيت الدور شبهي وقريب مني في حاجات كتير، وفي نفس الوقت حلو أوي كان نفسي أشتغل مع عادل من سنين، خاصة أني كنت المفروض أشتغل معاه بدور بنته في فيلم مرجان أحمد مرجان، ولكن كان فاضل لي أسبوعين وأولد وكنت متضايقة أوي، وقلت مش هضيع المرة التانية كمان وكان صعب أوفق بين العرض والعمل الرمضاني'.