بالفيديو - هشام ماجد يكشف للمرة الأولى أسباب انفصاله عن شيكو وأحمد فهمي

هشام ماجد

خلال استضافته في برنامج 'أسرار' الذي تقدّمه الإعلامية أميرة بدر عبر قناة 'النهار'، كشف الفنان هشام ماجد العديد من الأسرار التي يبوح بها للمرة الأولى حول علاقته بشيكو وأحمد فهمي وأسباب انفصالهم فنياً، كما تحدّث عن بدايته الفنية وسبب عدم ظهوره في البرامج الحوارية وغيرها من الاعترافات في السطور التالية:

- 'لما عملنا 'ورقة شفرة' كان كل واحد بيشتغل جنبه شغلانة مختلفة، وكنا سايبنها على الله'.

- 'أول واحد إدّالنا فرصة هو محمد حفظي، وأول حاجة عملناها كانت 'أفيش وتقفيش''.

- 'كنا بناخد في الحلقة على الكتابة 800 جنيه وتمثيل 300 جنيه، وشيكو كان رافض الشغل معانا وكان عايز يكمّل مهندس، وهو كان عنصر مهم جداً، وهو أقوى واحد بينا في التمثيل'.

- 'إحنا أصحاب من الجامعة، ولما جينا نعمل 'الرجل العناب' فيلم، بعد ما عملناه مسلسل، اتفقنا إن أحمد فهمي هو اللي هيكتب هو وشريف نجيب بس، عشان ميحصلش مشاكل'.

- 'لما فهمي كتب الفيلم، أنا وشيكو كان عندنا اعتراضات على الفيلم، وفهمي شاف إن ده عدم تقدير له، فقفشنا في الجزء ده، وقررنا إننا منعملش الفيلم سوا، وفهمي قرر إنه ينفصل ويشتغل لوحده'.

- 'كان بقالنا كتير بيحصل خناقات بس ومبتبانش للناس، وطول الوقت كان فيه اختلافات، ومفيش فرقة مبيحصلش فيها اختلافات، ومحدش بيكمّل وقليل اللي بيكمّل'.

- 'كنت أنا وشيكو برضو بنتخانق بس مبتوصلش إننا ننفصل، وممكن نشتغل مع بعض إحنا التلاتة، بس منرجعش نبقى فرقة تاني، لأن خلاص كل واحد عمل شغل لوحده ونجح'.

- 'أنا مش مغرور الحمد لله، ومتأكد إني مش مغرور، بس فيه ناس بتتغر وتتغير بعد الشهرة، والشهرة بتجنن'.

- 'إنك تبقى محدّش يعرفك وتعمل عمل يدغدغ الدنيا وتلاقي كل الناس بتتكلم عليك، أو يبقى مش معاك فلوس وتلاقي فجأة الناس بتعرض عليك فلوس كتير... دي نقلة في الحياة تجنّنك'.

- 'شُفت ناس بتتجنّن من الشهرة عشان مش سوية، والخضة دي بتخلّي الواحد منهم يتجنّن، ومبحترمهمش، عشان بين يوم وليلة ربنا إداله نعمة زيادة، فنسي الناس وأصحابه'.

- 'محدّش عمل معايا كده لأن محدّش يقدر يتكبّر عليا، ومش مشاهير بس فيه ناس عادية بتتغير، وإن شاء الله مش هتغير'.

- 'مسلسل 'أشغال شقة' هو نفس تيمة 'صباح الخير يا زوجتي العزيزة'، لكن ده نسأل فيه خالد دياب وشيرين دياب، لأني لم أتدخل في الكتابة، وعادي إننا نعيد التيمة لكن فيه حاجات كتير كانت مختلفة'.

- 'ضيوف الشرف هم أبطال المسلسل ومبنية عليهم القصة في الأساس، وانتصار ممثلة عظيمة وأنا سعيد بيها جداً في رمضان السنة دي، وكسّرت الدنيا بمسلسلين'.

- 'من أحلى الحلقات حلقة نهى عابدين لأن ضحكها في الجد بتاع نهى عابدين، وفي الكتابة مكانتش الحلقة دي عجباني، لكن خالد وشيرين أقنعوني'.

-' بحب 'اللعبة' و'الرجل العناب'، بس 'اللعبة' له مكانة خاصة عندي، لأنه مأثّر في الناس والأطفال متعلقة بيه'.

- 'إن شاء الله فيه جزء جديد من 'اللعبة' وبيتكتب دلوقتي، وهينزل السنة دي، وموضوع مواعيد رمضان مش فارقة لأن المسلسل الحلو بيتشاف وبيتشهر، وأبرز مثال مسلسل 'كامل العدد' نزل السنة اللي فاتت منصة بس'.

- 'مبطلعش في برامج من نوعية الاستجواب، وأنا قاصد الاختفاء لأني مش محتاج حد يعرف عن حياتي الشخصية حاجة، لأني ببيع للجمهور فن، لكن ملوش دعوة بعيلتي، ودي حاجات شخصية متتفتحش غير لناس قريبة، ومن حق النجم يعمل كده، وفيه نجوم بتحب تعرض حياتها عادي'.

- 'والدي كان دكتور وتوفّى وأنا عندي 13 سنة ووالدتي مدرّسة، وإخواتي شيرين أكبر مني بسنة ومحمود أصغر مني بـ8 سنين'.

- 'بعد وفاة والدي ابتدت الدنيا تقلّ شوية، لكن والدتي عمرها ما حسّستنا إننا ناقصنا حاجة'.

- وفاة والدي أثّرت في حياتي لأنه كان قريب مني وأنا كنت في سنّ صغيرة، وده حصلّنا كلنا، من الناحية المادية والنفسية برضو'.