بيومي فؤاد عن أزمته مع محمد سلام: اخطأت في تصريحاتي وكنت متغاظ لدفاعه عن أمير كرارة وأنا لأ ... لو زعلان مني انا آسف

تحدث الفنان بيومي فؤاد عن أزمته مع الفنان محمد سلام التي بدأت في 2023 على أعقاب اعتذار سلام عن عدم المشاركة في مسرحية ضمن فعاليات موسم الرياض احتجاجا على الحرب الفلسطينية، وتصريحات بيومي فؤاد المنتقدة لتصرفه.

قال بيومي فؤاد: 'أنا غلطت في الفيديو بتاعي، الناس ملهاش غير الظاهر، الناس مش عارفة اي كواليس في أي حاجة والظاهر بالنسبة لهم إن أنا واحد ببيع صاحبي، أنا مابقولش الكلام دا عشان الناس ترحمني، أنا لسه لغاية دلوقتي الناس بتقول علي بيومي فؤاد رخيص، ومابقولش كدة عشان يرحموني، أنا اقسم بالله لا بقرأ دا ولا دا ومعنديش سوشيال ميديا خالص، وبعد اللي حصل دا كله طلبت من الأولاد اللي ماسكين الفيسبوك بتاعي انهم يقفلوا كل السوشيال ميديا، واكتشفت انه كان مفتوح من برا، ومعرفش يعني ايه الكلمة دي، فتحوه من برا مصر، واكتشفت لما بعاتبهم إن قولت لهم اقفلوا الصفحات إن في بيوت مفتوحة و4 أو 5 عيال بيجيلهم فلوس شهري، وقولت لهم اعلموا اللي انتم عايزينه بس من فضلكم تابعوا مع المدام اي حد توفى هتبعتوا له، لأن المدام اكتشفت إن 'إنا لله وأنا إليه راجعون' بيكتبوها غلط، واقسم بالله ما معايا تليفوناتهم دلوقتي، ولا بشوف حاجة ولا بعمل حاجة'، حسب تصريحاته لبودكاست 'شقة التعاون' الذي يقدمه حسام داغر.

وتابع بيومي فؤاد: الكلام دا انا قولته قبل كدة، الناس ملهاش غير الظاهر، والظاهر أنا نفسي لو شوفت الفيديو بتاعي دا بقرف ومش عايز اشوفه، بس مبرره إيه؟ أنت اعتذرت في التليفون واحنا قبلنا من بعد ما كلمتك مرة واتنين وتلاتة وانت حبيبي وانا حبيبك، وقولت لك مش عايز حاجة من السعودية، قولت لي لا يا حبيبي، وطلبت منه ترشيح وقالي هات اي حد من مسرح مصر، والناس طلبوا مني الحق الفيديو اللي نزله، فأنا معرفش ومكنتش شوفت فبعتوا لي ولسه بتفرج عليه، ولقيت ناس فنانين بيبعتوا لي الحق، الحق، ليه؟ عشان انا ولي امره، وبيقولوا لي الحق ومايعرفوش ان انا كلمته في التليفون ومايعرفوش ان انا في المسرحية، فكلمته وقولت له انت اعتذرت واحنا قبلنا الاعتذار يا سلام، بس ارفع الفيديو دا، قال لي لأول مرة هقول لك اسف، قولت له براحتك يابني، وانا اخر واحد في الدنيا ممكن يتخيل تأثير هذه الحاجات على البني أدمين،

واستكمل بيومي فؤاد: ايه اللي زعلني وخلاني اطلع اعمل اللي اعمله دا، اتنين، الجانب السعودي عامة ومراتي قالوا لي هتطلع تتكلم في ايه ما اللي حصل حصل خلاص، وانا كنت متضايق ومتغاظ ومتكاد من سلام لأنه طلع دافع عن امير كرارة لما اتهموه وشتموه وطلعت اشاعة ان سلام كان معه في فيلم وعشان الفيديو وزعل السعودية مشاه من الفيلم، فراح داخل وقال احنا اسفين يا باشا مصر، وطلع اشاعة تاني على أحمد الجنايني، وأنه هيعملوا الجزء الثاني من 'وقفة رجالة' ومشى سلام، وشتايم فيه، راح داخل مدافع عنه، طب ما تطلع تدافع عن انور دا اختيارك! انا مكلمتوش، أملي في ربنا كبير ربنا يصلح الحال.

وتحدث بيومي فؤاد عن نجاح مسلسل 'كارثة طبيعية'، قائلا: 'مسلسل محمد سلام كسر الدنيا، ودا جبر خاطر، محمد سلام على الله، انا بعترف ان يوم الفيديو الناس من حقها تفهم كدة لأن دا اللي وصله ودا كان غلط، أما عن النوايا ربنا هيجيب الحق في الآخر ويظهر الحق، مع احترامي الكامل لكل اللي بيعمل، اللي مابيتضحكش عليه هيظهر الحق في الآخر، مين اللي ايه في ايه'.

ووجه بيومي فؤاد كلمة لمحمد سلام قائلا: اقول له نفسي اشوف لك حاجة في رمضان السنة دي ربنا يوفقك يارب ويصلح الحال وانا عارف معدنك، اللهم لك الحمد والشكر أنا ربنا سبحانه وتعالى عشان ربنا رب قلوب انا مافيش حد بتصدم فيه، ربنا يعدي المسألة دي على خير وانت تعلم مين بيومي فؤاد وربنا يوفقك وتكسر الدنيا ونشوفك في كل الشغل ولو زعلان مني يابني انا اسف،ولو أنا ضايقتك في حاجة انا اسف