هيدي كرم: رفضت تقديم مشهد "قبلة" مع يوسف الشريف في فيلم "آخر الدنيا"

كشفت الفنانة هيدي كرم عن رأيها في مصطلح السينما النظيفة، وحكت عن رفضها تقديم مشهد قبلة مع الفنان يوسف الشريف وكيف تحايل القائمون على العمل ليخرج المشهد بصورة جيدة.

وقالت هيدي كرم خلال لقائها في بودكاست 'وفيها إيه': 'في فيلم 'استغماية' أول فيلم عملته في حياتي كان في حاجات مقدرتش أعملها تحايلنا عليها وعملناها بشكل مرضي بالنسبة ليا، وفي فيلم 'آخر الدنيا' كان في مشهد بيني وبين يوسف الشريف المفروض فيه قبلة وأنا قلت للمخرج أمير رمسيس إني مش هقدر أعمل كده، قلت مش هينفع ومش عايزة وفي مجتمع وعيلة، فهو كان عارف لكن مش هيقدر يلغيها لأنها مهمة للأحداث، فقال أنه هيتحايل في تكنيك الكاميرا وكانت عايزة حرفنا مننا وأحنا بنقرب من بعض في اللحظة اللي الكاميرا بتصور، هي في الحقيقة محصلتش'.

وأكملت هيدي كرم: 'مفيش حاجة اسمها لأ لكن في حاجة اسمها هنفذها إزاي، وفكرة السينما النظيفة والسينما غير النظيفة مودناش في داهية غير هذه الأفكار، أنا مش مع السينما التجارية بتاعة سينما ولا مشاهد، لكن أنا مش مع فكرة أن في لو في فكرة رائعة اتنازل عنها في فيلم لأن المخرج مش ذكي ومش قادر يطلعها بشكل مقبول'.

وأكدت هيدي كرم إنها لا تعتبر نفسها جريئة قائلة: 'لو الناس شايفين إني جريئة أنا مش شايفة إني جريئة خالص أنتوا مشفتوش حاجة الجرأة حتة تانية، أنا صادقة وبحس إني أنا المفروض مخافش من فكرة ومن دور، ومش بشوف نفسي جريئة'.

يذكر أن هيدي كرم عرض لها مؤخرا عبر قناة ON مسلسل 'وتر حساس'، بطولة صبا مبارك ومحمد علاء وإنجي المقدم وهيدي كرم وأحمد جمال سعيد ومحمد العمروسي وهاجر عفيفي ولطيفة فهمي وتميم عبده وأحمد طارق نور ومحمد علي رزق، وهو من تأليف أمين جمال وإخراج وائل فرج.