ابنة محمد عبد الوهاب: نتمنى تجسيد السيرة الذاتية لوالدي وهشام سليم كان الأقرب للدور

تحدثت عفت عبد الوهاب ابنة الموسيقار الراحل محمد عبد الوهاب عن إمكانية تقديم عمل فني يجسد حياة والدها.

قالت عفت عبد الوهاب خلال حوار لها مع الإعلامية إيمان أبو طالب في برنامج 'بالخط العريض' المذاع على قناة الحياة 'مفيش حد فينا اشتغل في الفن وهو مشجعناش خالص واحنا مكناش عايزين وكفاية هو علينا أكبر فنان في البلاد العربية وحتى اوروبا بيسمعوه'

وأجابت عن تساؤل الإعلامية إيمان أبو طالب حول سبب عدم وجود أعمال فنية ترصد حياة محمد عبد الوهاب وقالت 'احنا مرفضناش وبالعكس احنا عايزين نعمله سيرة ذاتية بس مفيش حاجة اتعرض علينا تستاهل هو راجل عاش للفن فلازم يتعمله حاجة كبيرة وكان في مشروع مسلسل لكن منجحش ولغاية دلوقتي لو اتعرض علينا حاجة تستاهل اسمه احنا مستعدين وكل الشروط أن العمل يبقى من مقامه'

وعن الفنان الذي يمكن تجسيد شخصية عبد الوهاب قالت 'هشام سليم كان مقرب لينا وانا كنت بشوف أنه ممكن يعمل دور عبد الوهاب وطبعا كان ممكن يتم تقريب الشكل لكن المسلسل متعملش وهشام الله يرحمه ودلوقتي مبشوفش أي حد'

وأضافت 'أنا محبتش أي حد جسد شخصية عبد الوهاب في المسلسلات يمكن الوحيد عبد العزيز مخيون في مسلسل أم كلثوم لكن لو هيتعمل مسلسل ليه لازم يتعمل اقوى'

كما تحدثت عن أصدقاء والدها حيث قالت 'عبد الحليم كان واحد من العيلة وقضى معانا أعياد ميلاد وافراح واحيانا كنت بشوف فاتن حمامة وليلى فوزي ومديحة يسري'

وتابعت 'كان بيحب عبد الحليم جدا وكان بيعتبره من أهم مطربين العرب، وعبد الوهاب كان بيهزر وبيضحك مع كل الموسيقيين'

وأضافت 'وكان بيسمع قرآن كتير وكان بيسألنا على مطربين جداد واحنا كنا بنسمع اجنبي اكتر زي مايكل جاكسون وقال أنه ستايل'

حمل آبلكيشن FilFan ... و(عيش وسط النجوم)