هيدي كرم تهاجم منتقدي محمد رمضان (فيديو)

خلال لقائها في بودكاست 'وفيها إيه'، المذاع على قناة 'ستوري بالعربي' هاجمت الفنانة هيدي كرم منتقدي الفنان محمد رمضان بسبب لقب 'نمبر وان'، كاشفة عن موقفها من العمل معه.

قالت هيدي: 'أحب أشتغل معاه جدًا.. اللي ينكر نجومية وذكاء وإصرار وتطور محمد رمضان يبقى بيضحك على نفسه'.

تابعت: 'أنا معنديش مشكلة مع محمد رمضان لا على المستوى الفني أو الشخصي، بشوفه شخص لطيف جدًا في الأماكن العامة وحبوب جدًا بيتصور مع كل الناس وباله طويل ابتسامته دايمًا عريضة وبيتعامل مع كل الناس في الشارع المصري بكل مستوياتهم بحب واحترام، فالحقيقة أنا شخصيًا معنديش مشاكل مع محمد رمضان هو نجم كبير وأي حد يتمنى يشتغل معاه'.

واستكملت: 'ليه كل الناس اعتبرت أغنية نمبر وان أن محمد رمضان واخدها على نفسه!، ممكن أي حد يغنيها على نفسه ويقول إنه نمبر وان، هو عنده طريقة يقصدها وهي ذكاء منه فيها شوية استفزاز بس تمام، ولكن في الآخر ليه منعتبرش محمد رمضان مثال للنجاح اللي من تحت لفوق'.

واختتمت هيدي كرم كلامها: 'ليه مشوار محمد رمضان منعتبرش إنه إلهام ليك إن كل شىء ممكن لو الواحد عنده الإصرار والعزيمة، ليه نشوف إن محمد رمضان بيستفزنا؟! ليه منشوفش إنه بيدينا مثل، وكل واحد يشوف الموضوع بنفسيته، وكل نجوم العالم الكبار مستفزين'.