سامي مغاوري عن كواليس "سابع جار": طلبوا مني ارتجل وسابوني قدام الكاميرا

حكى الفنان سامي مغاوري كواليس مشاركته في مسلسل 'سابع جار' والمشاهد الشهيرة التي تنتشر عبر مواقع التواصل الاجتماعي، موضحا أن أغلب هذه المشاهد كانت ارتجال.

وقال سامي مغاوري خلال لقائه في برنامج 'صاحبة السعادة' مع إسعاد يونس: 'بعتولي حلقتين قريت كده وقلت إيه الحلقتين دول هم عدد الحلقات كام؟ قالولي 30 قلت لا إيه اللي يخليني أعمل حلقتين من 30 حلقة قالولي ده ضيف شرف وبتاع بس لسه باقي الحلقات بتتكتب قلت لهم لا أنا عارف حكاية الحلقات بتتكتب ومش عارف إيه وأصل الخطوط راحت فين قالوا لي لا، ومخرجة لذيذة من المخرجات التلاتة كلمتني قالتلي معلش عشان خاطري ودي تجربة وإحنا ثلاث مخرجات وعايزينك معانا المسلسل في مواقف كتيرة صعبة فاحنا عايزين نعمل خط يكون مرتجل وده هيبقى بتاعك أنت، قلتلهم هألف كمان، قالتلي انت مش هتألف أنت هترتجل'.

وتابع سامي مغاوري: 'ابتدينا كل أما أروح يسيبوني يحطوا التلات كاميرات، في مشهد أنا مش عارف قاومت إزاي الضحك في اليوم ده مع مدام دلال عبد العزيز الله يرحمها مش ممكن وهي بقت تضحك وتقع وهناء الشوربجي تقول لها خلاص بقى سيبيه أنت بتفتحية كل شوية كل أما تلاقيني سكت تقولي 'طب أنت ما قلتلناش حكايه كذا' وتروح فاتحة أي موضوع'.

وأكمل حكايته: 'لحد ما جينا آخر يوم اللي هي في الدراما مشهد جوازي مع شيرين، في اليوم ده كل الستات اللي في العيلة جايبين وولادهم، لقيت التلات مخرجات كل واحده قعدت ورا كاميرا والمشهد بدأ وابتديت اتكلم خلص الحوار اللي هو مكتوب على الورق كل ما أبص لوحده تشاورلي كمل، أكمل إيه؟ وكل الممثلين كل اتنين أو تلاتة يخلصوا ويلفوا ورا الكاميرا وفجأه لقيت نفسي أنا وشيرين بنعمل مشهد فاصل كوميدي دخل في 12 دقيقة'.

مسلسل 'سابع جار' من بطولة دلال عبد العزيز، شيرين، هاني عادل،ورحمة حسن، أسامة عباس، هيدي كرم، سارة عبد الرحمن،ومحمد علاء، دعاء حجازي، صفاء جلال، أحمد داش، ومن تأليف وسيناريو هبة يسري، التي تشارك في الإخراج مع أيتن أمين ونادين خان.