فيديو - دانا حمدان تكشف تفاصيل تعرضها لتجربة مؤلمة مع عمليات التجميل: في نار طالعة من وشي ... أنا اتخدعت

كشفت الفنانة دانا حمدان تفاصيل تجربة مؤلمة تعرضت لها مؤخرا بعد خضوعها لإحدى عمليات التجميل.

وقالت دانا حمدان في فيديوهات نشرتها عبر صفحتها الرسمية في موقع التواصل الاجتماعي إنستجرام: 'أنا عديت بأسوأ 3 أسابيع في حياتي، وكنت تعبانة جدا وما زلت تعبانة جدا، والأمانة تقتضي إني زي ما عملت إعلان لحاجة وعديت بتجربة سيئة جدا لازم أطلع أقول اللي حصل معايا، لإني مش هينفع أسكت على الموضوع، اللي حصل بلا مبالغة شفط الروح مني'.

وأضافت دانا حمدان: 'من 3 أسابيع وأنا في الساحل في عيادة تجميل كبيرة جدا تواصلوا معايا وقالولي إحنا بنعمل حملة لمنتج إيطالي محفز للكولاجين، قلت لهم أنا مبحقنش حاجة في وشي، ومابعملش إعلانات مقابل حقن حاجة في وشي لإنها مسؤولية كبيرة'.

وتابعت دانا حمدان: 'دخلت ولقيت المنتج فعلا محفز للكولاجين ومعروف ومن شركة محترمة وقلت طيب أنا عيد ميلادي قرب، وكلمتهم قبل اليوم اللي المفروض أروح فيه وسألت سؤال واضح وصريح، المنتج لو فيه أي تغيير ولو بسيط لوشي وشكلي مش عايزة أعمله، قالوا لا مفيش'.

أوضحت دانا حمدان ما حدث بعد خضوعها للعملية قائلة: 'دخلنا حقنا وروحت البيت نمت صحيت وطلعت من الأوضة حصلت حالة سكوت في البيت من حجم وشي، نفخة فظيعة. كلمت العيادة قالوا روحي خدي حقنة والنفخة هتهدى وطبعا مهديتش'.

وأكملت: 'عدى 10 أيام ووشي مهديش، ورجعت القاهرة وبدأت أحس بحاجة مش طبيعية ونفخة بشكل غير عادي وألم لا يمكن وصفه، وصديقي ورى الصور واحد من أهم دكاترة التجميل في مصر، قال خليها تدوبه حالا ده ميتسكتش عليه، والعيادة رفضت تدوبه وعملوا سونار علشان يتأكدوا من تدفق الدم مكان النفخة، واكتشفت إن الحقنة فيها مادة ما ينفعتش يدوبوها، فأنا كده تحت الأمر الواقع'.

ووصفت دانا حمدان الألم الذي تشعر به قائلة: 'في نار طالعة من وشي، مش عارفة أحط وشي على المخدة... أنا اتخدعت'.

وروت دانا حمدان ما حدث بعدها قائلة: 'روحت العيادة وقابلت المديرة واعترفت إنهم حقنوني بكمية كبيرة أدت للي حصل'.

كما استعادت دانا حمدان تجربتها في المستشفى قبل يومين: 'لما روحت المستشفى انهرت تماما مش قادرة أستحمل الألم، وترجيع بهستريا، ومش قادرة آخد أدوية. أنا عايزة شكلي الأولاني كنت حاباه، ومن حقي أتخذ إجراء قانوني، وأقسم بالله أول وآخر مرة أحط إبرة في وشي'.