مصطفى كامل متحدثا عن أزمة راغب علامة: شُفنا فيديوهات الحفلة كلها والموضوع مش بوسة

تحدث الفنان مصطفى كامل عن تفاصيل أزمة إيقاف النجم راغب علامة بسبب حفله في الساحل الشمالي وظهور فتاة تقبله على المسرح.

قال مصطفى كامل: النقابة أجمعت على وقوع خطأ جسيم وكبير من جانب راغب علامة، وهو تواصل معي بعد القرار بـ3 دقائق، كلمني واعتذر، أنا قولت له واضح أن ده شكل أنت واخده لنفسك وكل واحد حر، لكن النقابة صاحبة حق'، حسب تصريحاته لبرنامج 'كلام الناس' الذي تقدمه ياسمين عز عبر شاشة 'MBC مصر'.

وتابع مصطفى كامل: النقابة لمت كل الخيوط اللي بتقول إن الخطأ اللي حصل خطأ كبير وجسيم، لما شوفنا الواقعة بشكلها الحقيقي، مش بالشكل اللي عاملينه القبيضة على السوشيال ميديا، إحنا شوفنا فيديوهات راغب علامة كلها في الحفلة، الموضوع مش بوسة زي ما الأفاقين والقبيضة بيروجوا، الشكل بتاع تلخيص الموضوع في قبلة، هي في الذقن ولا الفم ولا الأذن؟ لأ، مش هو ده الموضوع، لما نتفرج نلاقي دي طالعة ودي نازلة ودي بتتاخد من الإيد ودي بتتاخد من الوسط، الموضوع كان كبير في شكل فج.

وكشف مصطفى كامل خلال اللقاء عن اتفاق جمعه براغب علامة ولكن النجم اللبناني لم يلتزم به، وأضاف أن راغب قدم له اعتذارا صوتيا بعد المكالمة، واتفقا على طي الخلاف، وفوجئ بتصريحات جديدة من علامة أعاد فيها إشعال الأزمة، قائلاً: 'لما تتكلم كده بعد الاتفاق، يبقى إنت مش شايفني'.

وفيما يتعلق بالسخرية من بيان النقابة الذي صدر بخصوص منع راغب من الغناء، اعتبر كامل أن الانتقادات كانت 'حملات مأجورة' مدفوعة الأجر، قائلاً: 'فيه بوست بـ500 جنيه.. والتريند هو الغاية مش الموضوع'.