الملخص - إيمان الحصري في "صاحبة السعادة": روحي كانت مسجونة في جسم مريض

روت الإعلامية إيمان الحصري كواليس أصعب اللحظات التي عاشتها خلال رحلة مرضها وعلاجها في مصر وألمانيا.

واستعادت إيمان الحصري لحظات شعورها بآلام شديدة، لدرجة أنها كانت تتمنى العودة للعمليات وأخذ 'البنج' طول الوقت.

وخلال استضافتها في برنامج 'صاحبة السعادة' الذي تقدمه الفنانة إسعاد يونس عبر قناة dmc، عبرت إيمان الحصري عن سعادتها بالمشاركة في تقديم حفل افتتاح طريق الكباش بالأقصر، ونلخص تصريحاتها للبرنامج في السطور التالية:

‎

- كان عندي مشكلة المفروض أعمل لها عملية، ودخلت على أساس إنها عملية بسيطة وهطلع بعد يومين، فقعدت 8 شهور

- المشكلة مش في العملية، المشكلة في الخطأ الطبي اللي حصل في العملية، والمشكلة الأكبر طريقة التعامل مع الكارثة اللي حصلت

- عملت 7 عمليات في 21 يوم، وكل مرة آخد بنج كلي، وفي كل مرة أطلع الوضع يسوء أكثر

- قعدت في المستشفى 8 شهور، منهم شهر تقريبا في العناية المركزة

- جالي تسمم في الدم بسبب الأخطاء والمشاكل الكتيرة اللي حصلت في منطقة العملية في المعدة

- بعد العملية الثالثة، بقيت حافظة كل 4 أو 5 أيام أنا راجعة العمليات

- من كتر الألم الشديد جدا بقيت عايزة أدخل العمليات وآخد 'بنج' علطول لو هو ده الحل

- في العناية المركزة كان أي حد يشوفني يقول جثة هامدة من كتر التعب

- حالتي طبيا على الورق كانت كل حاجة بايظة، وكل المؤشرات الحيوية فيها مشكلة كبيرة

- كنت عايشة في قوضة كل اللي بسمعه طول الوقت صوت الأجهزة، وشامة ريحة المستشفى

- نقلوني من العناية لقوضة، وكان بالنسبالي بهجة إن يبقى في تليفزيون وممكن أبص من الشباك، وأشوف حاجة مختلفة عن الضلمة والبرد

- بقائي على قيد الحياة كان مرتبط بأجهزة، ومش قادرة أتحرك من غير مساعدة

- كان عندي وقت طويل أقعد مع نفسي وأفكر إن عندنا نعم كتيرة الواحد مش شايفها

- إخواتي الاثنين وبنتي كانوا معايا طول الوقت، وسابوا حياتهم وبيوتهم وشغلهم

- في الشهر الرابع أو الخامس بدؤوا يمهدوا لبنتي إن أمها مش هتكون موجودة

- أحد أكبر الجراحين في أوروبا بكى بعد الاطلاع على حالتي، وقال أعتذر لك بالنيابة عن كل أطباء العالم

- وقعت قبل إجراء العملية في الخارج على إقرار باحتمال وفاتي نتيجة مضاعفات العملية

- بعد العملية كنت أتناول مسكنات قوية فيها نسبة من الإدمان، وتم وضع برنامج علاجي تدريبي للتخلص منها

- قبل سفري لألمانيا تم إرسال تقاريري الطبية، وبعض المستشفيات رفض حالتي

- عرفت إن الناس كلها كانت بتدعيلي، وجالي فيديوهات لناس عملتلي عمرة، وناس ولعتلي شموع

- خلال رحلة العلاج اكتشفت إن بنتي يعتمد عليها وإنها راجل معايا

- صاحبتي مصرية عايشة في أمريكا سابت جوزها وبيتها وجت قعدت معايا الشهرين كلهم

- فريق التمريض في مصر وألمانيا كانوا طيبين جدا معايا

- فرحت جدا بعد دعوتي للمشاركة في تقديم حفل افتتاح طريق الكباش لكن كنت خايفة

وكانت الإعلامية إيمان الحصري تعرضت لأزمة صحية قبل عدة أشهر عقب خطأ طبي حدث لها أثناء خضوعها لعملية جراحية.

وفي أول ظهور لها بعد أزمتها الصحية، شاركت إيمان الحصري في تقديم حفل افتتاح طريق الكباش، الذي أقيم بالأقصر يوم 25 نوفمبر الماضي.

حمل آبلكيشن FilFan ... و(عيش وسط النجوم)