إلهام شاهين : عادل إمام إداني فرصة عمري وقاللي إمكانياتك كبيرة وإنت ممثلة جامدة

حرصت الفنانة إلهام شاهين على تهنئة 'الزعيم' عادل إمام بمناسبة عيد ميلاده الثاني والثمانين، وذلك من خلال مقطع فيديو تحدثت فيه عن فضل عادل إمام في وضعها على بداية سلم النجومية.

وقالت إلهام شاهين : 'كل سنة ونجم نجوم مصر الفنان الكبير زعيم الفن عادل إمام طيب وبخير، بحبك من كل قلبي يا عدولة ولا أنسى فضلك علي أبدا'.

وأضافت : 'أول مرة في حياتي أقف أمام كاميرا وأول فيلم وأنا في سنة أولى معهد فنون مسرحية كان فيلم أمهات في المنفى بطولة عادل إمام. كان عندي 3 أو 4 مشاهد قدامه وكنت فرحانة جدا بيهم والباقي أمام ممثلين آخرين، ويمكن أول مشهد أصوره كان معاه، وكانت إسكندرية كلها سامعة دقات قلبي'.

‎‎

وتابعت : 'بعد تخرجي مباشرة رشحني النجم الكبير عادل إمام وإداني فرصة عمري في فيلم الهلفوت مع العمالقة وحيد حامد والمخرج سمير سيف، ودور زي دا كان حلم حياتي، ونقلة كبيرة خلقت اسم إلهام شاهين ووضعتني في مكان من النجومية واختصرت لي سنين كتير. وبعد الهلفوت بقى ينصحني لا أقبل أي حاجة ويقوللي إنت ممثلة جامدة، وكانت أول جايزة في حياتي كأحسن ممثلة في الهلفوت'.

وأكملت : 'لما عملت مع الفنان الجميل عادل إمام فيلم رمضان فوق البركان سألني ليه قبلت الدور دا، ممكن أي حد يعمله وإنت إمكانياتك أكبر، فاستغربت لأنهم لو قالولي امشي قدام الكاميرا في عمل مع عادل إمام هوافق، ولا أنسى كلامه ورأي نجم زيه إداني ثقة كبيرة في نفسي والمستقبل'.

واختتمت إلهام شاهين رسالتها بتوجيه الشكر إلى عادل إمام قائلة : 'أشكرك من كل قلبي ولا أنسى فضلك علي وعلى السينما المصرية، وإمتاع المواطن العربي في كل مكان لا أحد ينساه، وأفلامك ضد الإرهاب وأفلامك اللي لها معاني مهمة'.

حمل آبلكيشن FilFan ... و(عيش وسط النجوم)