كشفت الفنانة المصرية أنغام أنها على استعداد لفكرة التمثيل في الفترة الحالية، بعد أن قدمت آخر أعمالها الدرامية عام 2013 من خلال مسلسل 'في غمضة عين' مع الفنانة المصرية داليا البحيري.
وقالت أنغام في مداخلة هاتفية عبر إحدى البرامج التلفزيونية: 'أنا بحب التمثيل جدا، وعندي استعداد لو اتعرضت عليا حاجة حلوة ومناسبة وملائمة لمرحلتي وشكلي دلقوتي، لكن لسه مفيش حاجة'.
وأضافت الفنانة المصرية: 'في دايماً قلق.. أنا قلوقة وبخاف.. بحب شغلي أوي فببقى خايفة أوي.. لكن بنفس الوقت بيبقى طاقة عندي طاقة لما يكون حاجة حلوة.. وعندي مؤشر انه ده حيعجب الناس'.
وأكدت أنغام سعادتها بردود الفعل بعد طرح أغنيتها الجديدة 'أنا بعته كتير' مؤخراً من كلمات أمير طعيمة، وألحان إيهاب عبد الواحد، وتوزيع طارق مدكور، وقالت: 'أنا دايما مراهنة على الناس، وعلى وعي الجمهور وإحساسهم، وبشوفهم متلقين راقيين جدا. ونجاح أغنية زي 'أنا بعته كتير' بيقول كده ويؤكد وجهة نظري.'
وعن رأيها في الترندات وعدد المشاهدات كمقياس لنجاح الأغنية، قالت الفنانة المصرية: 'طبعا ببقى فرحانة بردود الأفعال والكلام الحلو اللي بيتقال، بس بخاف شوية من فكرة التركيز مع الأرقام. لازم الأغنية تاخد وقت شوية عشان الواحد فعلا يبتدي يصدق، وميتغرش من أول لحظة بأرقام حلوة جدا طبعا، بس دايما عندي رعب.'
وعلقت أنغام على فكرة أغنية 'أنا بعته كتير'، قائلة: 'بدور على الفكرة المختلفة اللي متقلتش قبل كده.. هي حالة إنسانية وصادقة قوي، وحبيتها من أول ما سمعتها'.
وأضافت: 'كليب الأغنية بسيط وفيه حركة وتعبير، وبنحاول نعمل حاجة مختلفة شوية، ومش نحط الكلام على رسوم متحركة، والفيديو كليب مش فل ولكن فكرته مكلفة جدا، وبنحاول نخلي فكرة الكليب بسيطة وأغنية لتوصيل المعنى للأغنية'.
ورأت أنغام أن تراجع الإقبال على تنفيذ الأغاني بطريقة الفيديو كليب راجع إلى التكلفة المرتفعة لتنفيذ الفيديو كليب، موضحة أنها إذا قدمت عشر أغنيات على مدار العام لن تتمكن من طرحها جميعها على طريقة الفيديو كليب.
وتحدثت الفنانة المصرية عن أنها تلقت الجرعة الأولى من لقاح كورونا، وأكدت أنها مستمرة في تطبيق الإجراءات الاحترازية، ومتفائلة جداً بالفترة القادمة بعد فتح القطاعات في مصر.
