تامر حسني للمحبطين: الراحة الأبدية في الجنة.. وافتكروا معاناتي

يعكف الفنان المصري تامر حسني مؤخراً على إطلاق رسائله التحفيزية لمتابعيه، لحثهم على النجاح في حياتهم العملية، بعيداً عن المحبطين والتعليقات السلبية، مستعرضاً في تدوينة نشرها عبر فيسبوك بداياته الحياتية، وكيف استطاع تحقيق حلمه بالرغم من المعاناة.

وكتب حسني رداً على الانتقادات السلبية، التي تعرض لها أثناء سعيه لبث روح الأمل في قلوب متابعيه في منشور سابق: 'قرأت معظم التعليقات على قد ما قدرت على اخر بوست ليا اللي تحت دا، وفهمت اكتر حاجتين من تعليقاتهم عاملين احباط لمعظمكم، أولاً اليأس من النجاح، وثانيا احباط المقربين، و بعضكم واصل لفقدان الامل و الشغف و بعضكم فاقد الامل في الحياه نفسها'.

ووجه تامر حسني رسالته لمنتقديه، مضيفا: 'افتكروا معاناتي في بدايتي وظروفي الصعبة من غير أب، ومنغير أي فلوس وبنزل اشتغل في الشوارع من عامل في محطة بنزين لـ سوبر ماركت… يعني اللي بيبنوا العمارات بطلع طوب واسمنت عشان ارجع بيتي لامي الغلبانه بأي خمسه جنيه بالإضافه لمرتب النادي لما كنت بلعب كوره كان مرتبي 22 جنيه في الشهر منهم بقى تحويشة الميه والكهربا وعمليات أخويا عشان كان عيان لفتره كبيره كنت بعمل المستحيل فعلاً عشان أمي واخويا وعشان اوصل لهدفي'.

وأشار النجم المصري إلى أنه كان يسعى دوماً لحلمين، بأن يصبح لاعب كرة قدم، أو بأن يحترف مجال الغناء، موضحاً أهمية 'الخطة البديلة' في حياة الإنسان أثناء سعيه لتحقيق حلمه، وعلق: 'كان جوايا سعي دائم لطريقين الكورة والغناء وبقول دا عشان ناس كتير عايز أنصحها بالخطة البديلة، عشان لو الحلم مجاش يكون في غيره، زي ما أنا كان نفسي أبقى لاعب كورة، والكورة مش ليا والأندية كلها مشوني رغم تفوقي، كنت بسأل نفسي ليه الأبواب كلها بتتقفل في وشي، أتاريها بتتقفل عشان توجهني لمسار آخر، ولما آمنت بكده فهمت قدام إن ربنا كان شايلي الأحسن ليا، بس ساعتها مكنتش فاهم'.

وتابع تامر حسني: 'اللي بيسأل نفسه دلوقتي يعني أنا أكمل في حلمي ولا أشوف حلم تاني هقوله دايماً اطلب من ربنا يساعدك هتلاقي علامات بتجيلك بس الشاطر اللي يفهمها، علامات هتأكدلك تكمل أول لأ، بس اجتهد واتعب عشان المجهود دا ليه كرم متحوشلك في مجالك التاني' فـ اوعى تقول تعبت عالفاضي'.

وتطرق تامر حسني في حديثه عن الذين وصفهم بالـ 'المحبطين'، مشيراً في حديثه إلى أن الراحة الأبدية هي في 'الجنة فقط' بحسب تعبيره، وقال: 'هيفضلوا موجودين انت اللي بتسمعلهم وانت اللي بتسمح انك تتأثر بيهم، إمنع دا فوراً متبقاش السبب في أذية نفسك متتشدش غير لكل جميل ولكل إيجابي هتلاقي كل الحلو بيجيلك و متعملش العكس عشان هيجيلك برضو عشان كدا بقولك إنت السبب دايماً قول يارب واجتهد وافهم ان الراحة المطلقه في الجنة بس واحنا على الارض وربنا قال انه خلقنا في كبد يعني شقاء عشان يكون عندنا تحدي نكسبه ولازم نكسبه عشان كتير قبلينا كانت ظروفهم أصعب ووصلوا يبقى الموضوع فينا، متبقاش أكبر عدو لنفسك، انت السبب، خد قرار صارم فوراً في التغير والنهوض والنجاح ، والله هتوصل… متسمعش غير لقلبك وسلم قلبك للّي خلقه وتوكل على الله'.