هند عاكف: تجاوزت قواعد مهرجان القاهرة السينمائي دون قصد.. ومش هكرر الخطأ الدورة المقبلة

كشفت الفنانة هند عاكف عن موقفها من مهرجان القاهرة السينمائي في الدورة المقبلة بعد أزمتها العام الماضي لافتة إلى أنها قررت عدم الذهاب إذا لم يتم دعوة خاصة لها.

وأضافت خلال حوارها عبر قناة 'هي' في برنامج 'المنسي' مع الإعلامية إنجي هشام، قائلة: 'مش هروح مهرجان القاهرة غير لو اتقدمتلي دعوة اللي حصل أيام مهرجان القاهرة معنديش استعداد يحصل تاني أنا مكنتش أتوقع أن ده ممكن يحصل لأن أنا فنانة بشتغل من وأنا عندي 4 سنين وليا أعمالي والحمدلله أنا مش وجه جديد وحتى لو وجه جديد مينفعش أبدا في مهرجان بلدي يتقالك لا'.

وتحدثت عن علاقتها بالفنان حسين فهمي بعد الأزمة: 'أستاذ حسين بحبه أوي بغض النظر عن اللي حصل في المهرجان ده فنان عظيم له تاريخه ومعتقدش أن هوا اللي قالهم يعملوا كده استحاله أنا مكنتش حابة الموقف ده يحصل لكن مقدرش أزعل منه.. أنا كنت بروح لما كان أستاذ حسين فهمي رئيس المهرجان من 20 سنة وكانت بتحيلي دعوة، يمكن اللي حصل السنة دي بسبب إنه حاطط قواعد معينة للفنانات، ويمكن أنا تخطيت القواعد دي بدون ما أقصد'.

وأعلنت أسباب اختفائها السنوات الماضية، وعدم مشاركتها في أي عمل فني، وذلك بعد قيام ثورة يناير.

وقالت إنها دخلت في العمل السياسي بعد قيام ثورة يناير وانتهائها من مسلسل قلبي دليلي بالرغم من تعاقدها على ثلاثة أعمالها أبرزهما بطولة مع النجم محمود حميدة، ولكن لم يتم تنفيذهم.

واستكملت هند عاكف: الدنيا خدتي والمجتمع المدني والسياسي أخدني وحسيت إني عندي مسئولية تجاه المواطن المصري وتجاه بلدي وواجب عليا أقف جمب بلدي زيي زي أي مواطن بيحب بلده، وقولت بس ربنا عايزني أكمل في المشوار ده وبعتلي رسالة، واختفيت 10 سنين عن المجال الفني، وسافرت روسيا ورجعت رشحت نفسي لمجلس الشعب.

وتابعت: 'مش ندمانة إني اشتغلت في السياسة ده خير ربنا هيحاسبني عليه ، لكن زعلانة من نفسي اني مقدرتش أوفق بين الاتنين، كان ممكن أدي واجبي تجاه وطني وأمثل في نفس الوقت ولما رجعت لقيت الحركة الفنية اختلفت وده زعلني ولكن معرفتش استسلم'.

حمل آبلكيشن FilFan ... و(عيش وسط النجوم)