كريم عبد العزيز: أنا أهلاوي طبعا ... سميت أحمد عز "كريستيانو" ونفسي أعمل فيلم مع أحمد حلمي

كشف الفنان كريم عبد العزيز أهم ما جذبه لفكرة فيلمه الجديد 'المشروع X'، وتحدث عن علاقته بالفنانين أحمد عز وأحمد السقا.

قال كريم عبد العزيز في حديثه للإعلامي عبد العزيز أحمد في برنامج 'مساء الإمارات': 'المشروع إكس' استمرار لنجاح العمل مع بيتر ميمي، بيتر أخويا مش صاحبي، و'المشروع X' ده التعاون الخامس بيننا، بعد 'الاختيار 2'، و'الاختيار 3'، و'بيت الروبي'، و'hلحشاشين'.

وأضاف: كان هدفنا نغير، كنا عاوزين نروح لنوع جديد، وأكشن بشكل جديد، ويارب الناس تستقبل الفيلم بشكل حلو.

وعن أهم ما جذبه لفيلم 'المشروع إكس' قال كريم عبد العزيز: تجربة أكشن فيه حركة، وعجبني قوي السطر اللي قالهولي بيتر ميمي في الأول، السطر اللي بين إن الفيلم مرتبط بالهرم والحضارة بتاعتنا، فحسيت فيلم مختلف معملتهوش قبل كده.

وحكى كريم عبد العزيز عن موقف لطيف مع أحمد عز قائلا: أحمد عز أخويا، وأول مرة اتعاونا مع بعض كان في إعلان وبعدين قدمنا 'كيرة والجن'، ومن أول يوم عز بياكل بطريقة معينة، وبعدين عز مهتم قوي بجسمه وبالجيم، فقلت له 'أنا حاسس إني قاعد مع كريستيانو'، فقال لي وانت 'مسي' ومن يوميها طلعت علينا هو كريستيانو وأنا ميسي.

وحرص كريم على توجيه تحيه للنجم المصري محمد صلاح، وهنأه على الفوز بثلاثة ألقاب هذا الموسم مع فريقه ليفربول، قائلا: أنا أهلاوي ... ومبفوتش مباراة لليفربول عشان صالح، محمد صلاح ده فخر العرب أسطورة مصرية عربية ليه كل التقدير.

وعن إمكانية تقديمه فيلم مع أحمد حلمي قال: أتمنى، يا ريت أعمل فيلم مع حلمي، دا أخويا برضه مش صاحبي، بينا عشرة سنين وعلى طول عند بعض في البيت، أنا أعرف حلمي من أيام فيلم 'عبود على الحدود' من 30 سنة، وبيني وبين حلمي كيميا، أتمنى أعمل فيلم مع حلمي، ونفسي كمان أعمل فيلم مع السقا ونتجمع فيه احنا الأربعة (عز وحلمي والسقا وأنا) عشان تولع بقى.

وكشف كريم في آخر اللقاء عن اهتمامه بخوض تجربة تقديم أعمال قصيرة على 'المنصات' قائلا: إن شاء الله أعمل ده بعد 'الفيل الأزرق 3' وهنبدأ تصوير في نوفمبر.