لايف ستايل
موقع كل يوم -في فن
نشر بتاريخ: ٢٤ شباط ٢٠٢٦
دياب في 'هي كيميا':استيفان روستي العصر الحديث ... شرير وخبيث ومش سالك أبدا وفوق ده كمان كوميديان شاطر.
أحمد مجدي في 'الست موناليزا':دور 'حسن' صعب جدا ... 'التوكسيك' دور جديد على الدراما لا هو طيب ولا هو شرير حاجة كده 'دحلابة' متتمسكش.
رحمة محسن في مسلسل 'علي كلاي:ماشاء الله رحمة أخدت دور 'كاميليا' لحتة تانية ... مش عارف فين الصراحة ولسه بندور عليها، بس هي أي حتة غير التمثيل.
'يرضيك أنام جعان':إعلان شركة 'الجبنة' اللي قدمه هيثم شاكر وجنات كسب سباق إعلانات رمضان 2026 بالضربة القاضية ولا عزاء لمنفقي الملايين.
عصام عمر في 'عين سحرية':خلصت فيك كل الكلام والله ... قريبا جدا النجم الجماهيري الأول في مصر ... ربنا يزيدك وتفضل زي ما انت عصام عمر.
'تعب' تتر مسلسل 'حد أقصى' لمحمد منير:كالعادة يا 'ملك' أروع تتر اتقدم في 2026، إحساسك بكلمات الشاعر أحمد شكة ولحن أحمد حمدي رؤوف يتدرس.
ميشيل ميلاد في 'هي كيميا':خفة دم مصرية أصيلة ... 'محمود العويل' مكانش ضربة حظ ... كوميديان صاعد بقوة ومستنيينك في 'النص 2'.
آسر ياسين في 'اتنين غيرنا':شكرا يا آسر إنك لسه بتفكرنا في الدراما إن لسه في شخصيات طبيعية محلقتش شعرها وبتخن صوتها ولبست فانلة كت وبتتكلم بسجع الكهان.
مصطفى شعبان:هيتكتب اسمه في تاريخ الفن إنه رائد فن جديد هنسميه 'دراما السجع' ... يعني رغم تقديم قصة جديدة كلها إثارة وتشويق يظل ¾ السيناريو عبر وأمثال وحكم تكاتك.
'الإعلانات العائلية':مش عارف الحقيقة عاوزين تقولوا ايه؟ خلونا ساكتين أحسن.
دراما رمضان 2026:ألف مبروك هتكوني أول سنة في التاريخ يتقدم فيكي مسلسلين لنجمين بيلقحوا على بعض بأدق تفاصيل العلاقة ... بجد أخص.
إيهاب فهمي في 'أولاد الراعي':عاوز تشوف نموذج حي لكلمة 'نضج فني' ... اتفرج على ثعبان قادر على التلون واللدغ في اللحظة المناسبة.
