حسن شاكوش يعتذر لصناع "حاجة مستخبية": مش قصدي (فيديو)

وجه المطرب حسن شاكوش اعتذاره لصناع أغنية 'حاجة مستخبية' للفنان محمد حماقي، مؤكدا أن ما حدث سوء تفاهم.

وظهر حسن شاكوش في فيديو عبر حسابه على Instagram ليتحدث عن الأزمة التي تسبب فيها بسبب تصريحاته في برنامج الحكاية وقوله أن لحن أغنية 'حاجة مستخبية' مسروق من لحن أغنية تركية.

وقال حسن شاكوش في الفيديو: أنا مش قصدي أغلط في حق حد، أنا من طبيعتي مبحبش أغلط في حد وعمري في حياتي ما غلطت في حد في شغلي، وكل اللي في المجال أصدقائي وأخواتي.

وتابع ليوضح ما حدث: أستاذ عمرو أديب كان بيقول أن أغنية 'بنت الجيران' لأستاذ محمد حماقي، فأنا كنت بقول أن الأغنية بتاعتي وأنا مليش دعوة بأغنية حماقي خالص، كنت بنتكلم في إطار أن هو فكر أن 'بنت الجيران' أحنا سارقينها.

وتابع: أنا كنت بوضح الرؤية أن أغنية 'حاجة مستخبية' كان في بعض الأشخاص بيتكلموا أن في لحن تركي، ودا كان كلام كتير اتقال وقت ما نزلنا أغنية 'بنت الجيران'.

ووجه حسن شاكوش اعتذاره قائلا: أنا كنت بوضح لأستاذ عمرو أن أغنية 'بنت الجيران' بتاعتي وأغنية 'حاجة مستخبية بتاعة' الأستاذ محمد حماقي واللي ملحنها أخويا وحبيبي أستاذ مدين وهو دا الخلاف كله وطبعا أحنا اتكلمنا مع بعض كتير وهو على المستوى الشخصي أخ ليا وتحياتي لكل أسرة الأغنية وأنا مبحبش حد يزعل مني.

وقال شاكوش خلال حواره مع عمرو أديب: 'حماقي كان عامل أغنية اسمها حاجة مستخبية بقالها 5 سنين على يوتيوب وعاملة 16 مليون مشاهدة'.

وتابع: ' قالك إن أحنا سارقين اللحن بتاع حاجة مستخبية، قلنا مفيش مشاكل، وقعدنا مع الشركة وقلنا نقسم على 3 شركات، تلت لحسن وتلت للشركة وتلت لشركة حماقي، واللي أنا عرفته أن اللحن ده تركي وأصلا مسروق وناس كبيرة قالت الكلام ده'.

وأغنية حاجة مستخبية من كلمات محمد عاطف، ألحان مدين وتوزيع أحمد إبراهيم، وصدرت ضمن ألبوم محمد حماقي 'حاجة مستخبية'، وتم تصويرها فيديو كليب لتحقق 116 مليون مشاهدة.

وكان موقع يوتيوب حذف مهرجان 'بنت الجيران' لحسن شاكوش وعمر كمال، بعد تحقيقه 600 مليون مشاهدة، بناءً على طلب من شركة 'راديو النيل'.

وتمتلك 'راديو النيل' شركة 'نجوم ريكوردز' المنتجة لألبوم النجم محمد حماقي 'حاجة مستخبية'، الذي استخدم حسن شاكوش لحن أغنيته بنفس الاسم في مهرجان 'بنت الجيران'.