بالفيديو - هنادي مهنا تعلق على شائعات انفصالها عن زوجها وسخرية الجمهور من زيادة وزنها

هنادي مهنا

خلال استضافتها ببرنامج 'كلمة أخيرة' الذي تقدمه الإعلامية لميس الحديدي على قناة 'ON' سخرت الفنانة هنادي مهنا، من شائعات انفصالها عن زوجها الفنان أحمد خالد صالح، وعلقت قائلة: 'الموضوع مضحك وبيضحكني أوي، وقلت كويس إنهم مشغولين في الكلام وده، ومتخيلين إن بينا خلافات أحسن مايحسدونا'، مؤكدة أنها تشعر بالغيرة على زوجها.

وتابعت هنادي: 'أكيد أنا زي كل البني آدمين بس مش بتخانق.. وهو بيغير عليا في حدود الطبيعي، ‏وأحمد مش بيقولي ستو أنا، رغم إن الناس كلها بتقولي كده‏'.

وكشفت أنها أحيانا تقوم بفتح موبايل زوجها، لكن ليس لشيء سوى لأخذ صور بعينها أو خلاف ذلك: 'مفيش مجال للمنافسة بين راجل وست'.

وأضافت: '99 في المية من الصور على انستجرام فلتر، وكلها مش حقيقية والشكل والرشاقة حاجة مش مهمة أبداً المهم إن البنى آدم يكون مبسوط بنفسه هو من جواه، مش مهم رأى أي حد تاني وببقى راضية عن نفسي ومبسوطة لما بحس إن شكلي عاجبني'.

وأكملت هنادي، أنها تأثرت كثيراً في الفترات السابقة بآراء الناس، قائلة: 'فيه ناس مثلاً كانت بتقولي شكلك أحلى وإنتي تخينه معنديش مشكلة ومحترمة رأيهم بس مش هرجع تخينة عشانهم طالما مبسوطة بنفسي وأنا كده'.

وواصلت: 'في الأول كنت بـتأثر بكلام الناس وأنا مليانه كانوا بيقولولي شبهك زي الجاموسة، وكنت بضايق وأنا بقرأ الكومنتات، وأقعد أعيط لكن إكتشفت أن الانسان ممكن يضايق لما يكون ثقته في نفسه مهزوزة ودي فترة عديت بيها وكأنت أي كلمة بتخبط'.

مضيفة: 'لما الإنسان بيكون مبسوط ومرتاح من جواه خلاص بتبقى حياته طاقة إيجابية ومهما كتبوا مافيش باب لتسلل الطاقة السلبية'.

وحول كيفية نجاحها في إستعادة ثقتها بنفسها، قالت: ' أما حبيت نفسي في المرايا فرحت وخسيت مكنتش بحب ألبس حاجة حلوة عشان الهدوم مش بتيجي مقاسي كنت بنزل مش مهتمة بنفسي لكن ثقتي رجعت وبقيت مرتاحة لما ببص لنفسي في المراية'.

وتابعت: 'لما جيت مصر كان فيه دلع كتير أوي، محشي وحمام ومسقعة ودي حاجات مينفعش تتساب وماتتكلش، كنت بدرس في أسبانيا في مجال هندسة الصوت بمجال الموسيقى لأني كنت بحب المزيكا أوي وكان حلمي إني أغني قبل التمثيل واكتسبت ده من الجينات من والدي، ولما جيت مصر اشتغلت مدرسة ودرست كذا حاجة وكنت فاتحة شركة مع بابا وأنا بحب اشتغل من صغري حتى في الصيف من صغري ومش بحب أقعد في البيت'.

وتابعت: 'لما اشتغلت ممثلة مكنتش مستوعبة طبيعة الشغلانة وأن الشغل موسمي ممكن يبقى مكثف شهرين متتالين ثم شهرين آخرين قاعدين في البيت مش بنعمل حاجة ودي كانت حاجة بالنسبة ليا فيها إحساس غريب وكنت بقول فيه حاجة غلط لأني متعودة على الشغل اليومي وإني أنام وأصحى عشان ورايا شغل'.

وأكملت : 'أول ما مثلت الدنيا مامشيتش أوي، وفضلت سنتين أشتغل ومافيش حاجة تتذاع لحد أول عمل، وهو أفراح إبليس الي لسة معروض قريب، رغم الانتهاء من تصويره منذ فترة طويلة، وعملت كمان فيلم ووقف كل ده سببلي في فترة من الفترات، اكتئاب وكنت قاعدة في البيت فقعدت آكل'.

وكشفت عن أن جمهور السوشيال ميديا وقتها انتقدها: 'كان حقهم، وأنا في الأساس شكلي كان زي دلوقتي، بعد فقد الوزن، لكن الفترة دي كانت سبب في زيادة وزني حينها'.

وأكدت هنادي مهنا، أن دورها في مسلسل 'مكتوب عليا' لذي قدمته في رمضان الماضي قفزة في مسيرتها الفنية، وأنه يمثل الكثير لها كونه السبب في منحها طاقة إيجابية وفرحة غير عادية.

وقالت: 'أنا شغالة في المسلسل ده كنت باقولهم أنا جاية أتعالج عندكم نفسياً من كتر الفرحة والطاقة الإيجابية'.